Tesla 2021-yilda 930 422 dona elektromobil ishlab chiqardi va 936 172 dona elektromobilni sotdi, deyiladi kompaniya hisobotida. Bu ko‘rsatkichlar 2020-yilga nisbatan qariyb ikki baravar ko‘p. O‘sha yili Tesla 509 737 elektromobil ishlab chiqarib, 499 550 dona sotgandi.
Hisobotga ko‘ra, 2021-yilning to‘rtinchi choragida Tesla 308 600 dona elektromobil yetkazib bergan. CNBC ta’kidlashicha, bu Wall Street tahlilchilarining kutganidan ortiq bo‘lgan choraklik rekorddir. FactSet konsensus-prognozida esa to‘rtinchi chorakda Tesla’ning elektromobil ta’minoti 267 ming donaga, yil davomida esa 897 ming donaga yetishi taxmin qilingandi.
Umuman olganda, o‘tgan yil davomida kompaniya 24 390 dona Model S sedanlari va Model X krossoverlarini ishlab chiqargan hamda shu turdagi elektromobillardan 24 964 dona sotgan. Yangi seriyadagi avtomobillar — Model 3 va Model Y 906 032 dona ishlab chiqarilgan va 911 208 dona sotilgan.
“Butun dunyo miqyosida Tesla jamoasining ajoyib ishi!” — deya natijalarga izoh bergan kompaniyaning asoschisi Ilon Mask Twitter’da.
Sentabr oyi oxirida Ilon Mask keyingi to‘qqiz yil ichida Tesla’ning sotuv hajmini yiliga 20 million elektromobilga yetkazish rejasini e’lon qilgandi.
Oktabr oyida Tesla kapitallashuvi trillion dollardan oshdi. Mask kompaniya aksiyalarining qimmatlashishi fonida sayyoradagi eng boy odamga aylandi. Noyabr oyi boshida Tesla asoschisining boyligi 300 milliard dollardan oshdi. Hozir Maskning boyligini Forbes real vaqt rejimida yangilanadigan reytingida 271,7 milliard dollarga, Bloomberg esa 270 milliard dollarga baholamoqda.
Avvalroq Tesla texnik nosozliklarni tuzatish uchun 475 ming dona elektromobilini chaqirib olishi xabar qilingandi. Xususan, 2017–2020-yillarda ishlab chiqarilgan 356 ming dona Model 3 ning barchasi, 2014-yildan beri ishlab chiqarilgan 119 ming dona Model S avtomobillari qaytarib olinadi.
Izoh (0)