Italiya sobiq bosh vaziri, “Olg‘a, Italiya” partiyasining yetakchisi Silvio Berluskonining prezidentlik saylovlarini dastlabki uch turida g‘alaba qozonish ehtimolligi juda kam. Bu haqda Amerikaning The Wall Street Journal gazetasiga tayanib, “RBK” xabar berdi. G‘alaba uchun siyosatchiga unga muxolif bo‘lgan so‘l markazchilarning qo‘llab-quvvatlovi kerak bo‘ladi.
Amaldagi davlat rahbari Serjo Mattarellaning prezidentlik muddati fevral oyida tugaydi. Italiya prezidentini yetti yil muddatga yashirin ovoz berish yo‘li orqali ikkala palata deputatlari va viloyatlar vakillaridan iborat saylovchilar kollegiyasi saylaydi. Ovoz berish jarayonlarining dastlabki uch turida saylanish uchun ovozlarning uchdan ikki qismini qo‘lga kiritish kerak. Tahlilchilarning hisoblashicha, bu kabi ko‘pchilik ovozini to‘plash imkoniyatiga ega yagona shaxs — mamlakatning amaldagi bosh vaziri Mario Dragi.
Saylovning to‘rtinchi va keyingi turlarida g‘alaba qozonish uchun esa 50 foiz plyus bitta ovoz to‘plash kifoya. Amerika gazetasining yozishicha, bu yerda Berluskonining imkoniyati bo‘ladi, ammo Dragining imkoniyati ham ortadi. Ovoz berishning birinchi turi yanvar oxirida o‘tkazilishi rejalashtirilgan.
Nashr ma’lumotlariga ko‘ra, Berluskonini “Italiya og‘alari” va “Shimol ligasi” partiyalari yetakchilari Jorja Meloni va Matteo Salvini qo‘llab-quvvatlashga tayyor, biroq ularning ayrim vakillari partiyalar o‘rtasidagi kelishmovchilik tufayli boshqa nomzodlarga ovoz berishi mumkin.
Berluskoni prezidentlikka nomzodini qo‘yishi haqida rasman e’lon qilmagan — bu kabi taxminlarni OAVlar saylov oldidan yozmoqda. Dekabr boshida Britaniyaning The Guardian nashri uning partiyasi vakiliga tayanib, sobiq bosh vaziri bu borada “aniq ilhomlangani” haqida yozgan edi. Berluskonining maslahatchisi The Wall Street Journal’ga sobiq bosh vaziri o‘z nomzodini ilgari surish yoki surmaslik to‘g‘risidagi qarorini yanvar o‘rtalarida ma’lum qiladi.
Mario Dragi dekabr oyida hukumat usiz ham eplay olishini aytgandi — bu uning prezidentlik saylovlarida ishtirok etishga shama qilganini anglatgan.
Ayrim ekspertlar Berluskoni prezidentlik saylovlarida g‘alaba qozog‘ishiga shubha bildirgan. “Berluskoni buni uddalashiga ishonmayman, biroq u bilan taxmin qilish qiyin, chunki u barcha bashoratlarni rad etmoqda”, — deydi Buyuk Britaniyadagi Surreya universiteti professori Daniel Albertatssi.
Eslatib o‘tamiz, 85 yoshli Berluskonida 2021-yilning aprelida shifoxonaga yotqizilgandi. Siyosatchi 6-aprel kuni Milanning “San-Rafael” klinikasida nazorat tekshiruvidan o‘tgan, shundan keyin shifokorlar uni keyingi nazorat uchun shifoxonaga yotqizgandi. Shuningdek, 22-mart kuni ham Berluskoni aynan shu shifoxonaga keltirilgan edi. O‘shanda uning advokati sobiq bosh vazir va yana boshqa 28 kishi korrupsiya va yolg‘on guvohlik berish ayblovlari bilan o‘tkazilayotgan Milandagi sud majlisida mijozining sog‘lig‘i yomonlashgani haqida xabar berdi. 24-mart kuni esa Berluskoniga shifoxonadan javob berilgandi.
Izoh (0)