Sudan bosh vaziri mamlakatdagi inqiroz fonida iste’foga chiqishini e’lon qildi

Sudan bosh vaziri Abdulla Xamdok o‘z lavozimini tark etishini ma’lum qildi. Bu haqda “RIA Novosti” xabar berdi.

“Bosh vazirlikdan iste’foga chiqayotganimni e’lon qilaman, bu joyni vatanning boshqa o‘g‘il-qizlari ixtiyoriga qoldiryapman. Ular muqaddas vatanini boshqarishda, u bilan o‘tish davrining qolgan muddatini o‘tkazishda fuqarolik, demokratik davlat yo‘nalishidan yurishni davom ettirsin”, — dedi bosh vazir mamlakat davlat televideniyesi orqali efirga uzatilgan murojaatida.

Xamdokning so‘zlariga ko‘ra, ikki yildan ortiq vaqt davomida og‘ir sharoitlarda hukumatni boshqargani uning uchun sharaf bo‘lgan. “Bu vaqt ichida Vazirlar Mahkamasi Sudanni xalqaro izolyatsiyadan olib chiqishga muvaffaq bo‘ldi”, — deya ta’kidlagan u.

Sudan bosh vaziri o‘z faoliyati davomida “mamlakatni falokatga uchrashidan qutqarishga harakat qilganini” aytdi. Shuningdek, Abdulla Xamdok Sudandagi siyosiy partiyalar o‘rtasidagi muloqot “fuqarolik va demokratik davlatga o‘tish” uchun yechim ekanini qo‘shimcha qildi.

Sudan harbiylari 2021-yil 25-oktabr kuni bosh vazir Abdulla Xamdok va hukumatning yana bir qancha a’zolarini hibsga olgandi. Sudan o‘tish davri suveren kengashi rahbari Abdul Fattoh al-Burxon xalqqa telemurojaat yo‘llab favqulodda holat e’lon qilinishi va mamlakat hukumati tarqatib yuborilishi haqida ma’lum qildi. 26-oktabr kuni Xamdok va uning rafiqasiga hibsdan uyiga qaytishga ruxsat berildi.

Noyabr oyi oxirida Sudan harbiylari va Xamdok hokimiyatdan ag‘darilgan bosh vazirning o‘z lavozimiga qaytishiga va texnokratik hukumat tuzishga kelishib oldi.