Qozog‘istonning Olmaota shahridagi markaziy Respublika maydoniga kirish yopilgan, u joylashgan tumanda mobil internet uzilishlar bilan ishlamoqda. Bu haqda voqea guvohlariga tayanib, “Interfaks” xabar berdi.
Ijtimoiy tarmoqlarda tarqalgan videolavhalarga ko‘ra, Satpayev, Nazarboyev va Jeltoksan ko‘chalari bo‘ylab politsiya joylashtirilgan, u yerga na transport vositalarining, na piyodalarning kirishi mumkin emas.
Shahar aholisi bunday chora-tadbirlarni suyultirilgan gaz narxi oshishiga qarshi Mang‘istov viloyatida bo‘lib o‘tgan norozilik namoyishlari bilan bog‘lamoqda.
2-yanvar, yakshanba kuni Janao‘zen shahrida (Mang‘istov viloyati) avtomobil egalari 1-yanvardan boshlab litri 60 tengedan (1 492 so‘m) 120 tengega (2 984 so‘m) ko‘tarilgan suyultirilgan gaz narxini pasaytirish talabi bilan mitingga chiqdi. Xuddi shunday mitinglar butun viloyat, jumladan, viloyat markazi Aqtov shahrida ham bo‘lib o‘tdi.
Qozog‘iston prezidenti Qosim-Jo‘mart To‘qayev hukumatga “Janao‘zendagi vaziyatni zudlik bilan iqtisodiy maqsadga muvofiqligini hisobga olgan holda huquqiy sohada ko‘rib chiqish”ni topshirdi. 3-yanvar kuni Qozog‘iston hukumati davlat rahbari nomidan Mang‘istov viloyatidagi ijtimoiy-iqtisodiy vaziyatni ko‘rib chiqish bo‘yicha komissiya tuzilganini e’lon qildi va suyultirilgan neft gazi narxini tartibga solish bo‘yicha kompleks chora-tadbirlarni amalga oshirishga va’da berdi.
Mang‘istov viloyatidagi yoqilg‘i quyish shoxobchalari egalari o‘z tashabbusi bilan gaz narxini bir litr uchun 120 tengedan 85-90 tengega (2 200 so‘m atrofida) tushirishga rozi bo‘ldi. Raqobatni himoya qilish va rivojlantirish agentligi tomonidan yoqilg‘i quyish shoxobchalari egalariga nisbatan narxni belgilashda o‘zaro til biriktirish bo‘yicha surishtiruv ishlari boshlangan.
Avvalroq Buxoro viloyati Jondor tumanida bir guruh ayollar gaz va “svet” yo‘qligi sabab avtomobil yo‘lini to‘sib qo‘ygan edi. Tuman hokimligi bunga munosabat bildirib, aholining gaz elektr ta’minoti bo‘yicha iddaolari mutlaqo asossiz ekanini ma’lum qilgan.
Izoh (0)