Tesla 2021 йилда 930 422 дона электромобиль ишлаб чиқарди ва 936 172 дона электромобилни сотди, дейилади компания ҳисоботида. Бу кўрсаткичлар 2020 йилга нисбатан қарийб икки баравар кўп. Ўша йили Tesla 509 737 электромобиль ишлаб чиқариб, 499 550 дона сотганди.
Ҳисоботга кўра, 2021 йилнинг тўртинчи чорагида Tesla 308 600 дона электромобиль етказиб берган. CNBC таъкидлашича, бу Wall Street таҳлилчиларининг кутганидан ортиқ бўлган чораклик рекорддир. FactSet консенсус-прогнозида эса тўртинчи чоракда Tesla’нинг электромобиль таъминоти 267 минг донага, йил давомида эса 897 минг донага етиши тахмин қилинганди.
Умуман олганда, ўтган йил давомида компания 24 390 дона Model S седанлари ва Model Х кроссоверларини ишлаб чиқарган ҳамда шу турдаги электромобиллардан 24 964 дона сотган. Янги сериядаги автомобиллар — Model 3 ва Model Y 906 032 дона ишлаб чиқарилган ва 911 208 дона сотилган.
«Бутун дунё миқёсида Tesla жамоасининг ажойиб иши!» — дея натижаларга изоҳ берган компаниянинг асосчиси Илон Маск Twitter’да.
Сентябрь ойи охирида Илон Маск кейинги тўққиз йил ичида Tesla’нинг сотув ҳажмини йилига 20 миллион электромобилга етказиш режасини эълон қилганди.
Октябрь ойида Tesla капиталлашуви триллион доллардан ошди. Маск компания акцияларининг қимматлашиши фонида сайёрадаги энг бой одамга айланди. Ноябрь ойи бошида Tesla асосчисининг бойлиги 300 миллиард доллардан ошди. Ҳозир Маскнинг бойлигини Forbes реал вақт режимида янгиланадиган рейтингида 271,7 миллиард долларга, Bloomberg эса 270 миллиард долларга баҳоламоқда.
Аввалроқ Tesla техник носозликларни тузатиш учун 475 минг дона электромобилини чақириб олиши хабар қилинганди. Хусусан, 2017–2020 йилларда ишлаб чиқарилган 356 минг дона Model 3 нинг барчаси, 2014 йилдан бери ишлаб чиқарилган 119 минг дона Model S автомобиллари қайтариб олинади.
Изоҳ (0)