Gaiti bosh vaziri Ariel Anri mamlakat mustaqilligining 218 yilligini nishonlash paytida unga qarshi uyushtirilgan suiqasddan omon qoldi. Bu haqda VTV telekanaliga tayanib, “RIA Novosti” xabar berdi.
“Gonaiv shahri soborida otishma yuz berdi: kamida bir kishi halok bo‘ldi, bir necha kishi jarohat oldi. Gaiti bosh vaziri jabrlanmadi”, — deyiladi telekanal saytida.
OAV xabarlariga ko‘ra, hududda faoliyat yuritayotgan qurolli to‘da Gaiti rahbarini Gonaivda “qorasini ko‘rsatmaslik” haqida ogohlantirgan.
Suiqasddan so‘ng hukumat 1804-yil 1-yanvarda Gaitining Fransiyadan mustaqil bo‘lganini nishonlash uchun rejalashtirilgan boshqa tadbirlarni bekor qildi.
Eslatib o‘tamiz, Gaiti prezidenti Jovenel Moiz 2021-yilning 7-iyuliga o‘tar kechasi qurolli hujumchilar tomonidan o‘z qarorgohida otib o‘ldirilgandi. Hodisada prezidentning rafiqasi ham og‘ir jarohat olgan, ammo u AQShga olib ketilib, tibbiy yordam bilan hayoti saqlab qolingan.
Bir muncha vaqt o‘tgach, prokuror sudyadan prezidentning o‘ldirilishi bo‘yicha Ariel Anriga qarshi ayblovlar qo‘yishni talab qildi. Uning da’vosiga ko‘ra, bosh vazir va asosiy gumondorlardan biri Jozef-Feliks Badyu prezident o‘ldirilgan kuni telefon orqali gaplashgani tasdiqlangan. Keyinroq Ariel Anri prokurorni lavozimidan chetlatdi.
Izoh (0)