Kobulda Afg‘oniston Oliy sudining xodimlari “Tolibon” harakati hokimiyat tepasiga kelganidan so‘ng maosh berish to‘xtatilgani tufayli norozilik namoyishi o‘tkazdi. TOLOnews telekanalining aniqlik kiritishicha, gap texnik xodimlar haqida ketmoqda, sud tizimi “Tolibon” vakillaridan iborat.
“Oxirgi to‘rt oyda maosh olmadim. Hozir qish, havo sovuq. Odamlarning barchasi ko‘plab muammolarga duch kelmoqda”, — deydi Oliy sudning Najmiddin ismli ishchisi jurnalistlarga.
“Biz Islom Amirligiga petitsiya bilan murojaat qildik. Ular ishdan bo‘shatilmasligimizni bildirdi, ‘Tolibon’ hozircha uyda qolishimizni va ishga bormasligimizni aytdi”, — deydi sudning yana bir xodimi Muhammad Ilhom.
Uning so‘zlariga ko‘ra, Oliy sudning ayrim bo‘linmalari tugatilgani sababli 900 ga yaqin texnik xodim ishidan ayrilgan. Qolgan texnik xodimlar noaniq vaziyatda — ba’zilariga uyda qolish taklif qilingan, boshqalari ishlashda davom etmoqda, lekin maosh olmayapti.
“Tolibon” oktabr oyi o‘rtalarida Oliy sud uchun yangi tizim tuzilganini e’lon qilgandi. Yangi sudyalar — “Tolibon”ga a’zo dindorlar. Afg‘onistonning “Tolibon” tomonidan ag‘darilgan hukumati davrida ishga olingan xodimlar Oliy sud binolarini tozalash va boshqa maishiy muammolarni hal qilish uchun qoldirilgan.
TOLOnews xabariga ko‘ra, afg‘onistonlik shifokor va o‘qituvchilar ham oylik maoshi kechikayotganidan shikoyat qilmoqda. “Tolibon” hokimiyatni egallab olganidan keyin maosh berish to‘xtatilgan. Muammoning bir qismini Afg‘onistonning qator viloyatlarida shifokor va o‘qituvchilarning mehnati uchun to‘g‘ridan-to‘g‘ri haq to‘laydigan xalqaro tashkilotlar hal qilmoqda. Masalan, oktabr-noyabr oylarida Birlashgan Millatlar Tashkiloti Afg‘oniston bo‘ylab qariyb 23,5 ming tibbiyot xodimiga qariyb 8 million dollar maosh to‘lagan.
Shu bilan birga, “Tolibon” hokimiyatni qo‘lga kiritgach, mamlakatda ishsizlik keskin oshgan. Xususan, harakat tomonidan kiritilgan cheklovlar tufayli ko‘plab ayollar ishsiz qoldi. Afg‘on ayollari o‘z huquqlari, jumladan, ishlash huquqi toliblar tomonidan poymol etilishiga qarshi muntazam ravishda namoyishlar o‘tkazmoqda, deyiladi xabarda.
Afg‘onistondagi iqtisodiy vaziyat “Tolibon” hokimiyatni qo‘lga kiritganidan beri yanada yomonlashmoqda. Harakat ko‘plab mamlakatlarda terrorchi deb tan olingani bois boshqa davlatlar hukumatlari va ko‘plab xalqaro tashkilotlar Afg‘oniston hududida o‘z loyihalarini amalga oshirishni to‘xtatib qo‘ygan. “Tolibon” hokimiyatni qo‘lga kiritgunga qadar Afg‘oniston iqtisodiyotining deyarli yarmi chet el mablag‘laridan iborat edi.
“Tolibon” hokimiyatga kelgach, AQSh hukumati afg‘on aktivlarini, Jahon banki va Xalqaro valyuta jamg‘armasi esa Afg‘oniston iqtisodiyoti va boshqaruvini qo‘llab-quvvatlashga mo‘ljallangan mablag‘larni “Tolibon” qo‘liga tushib qolishidan va noto‘g‘ri maqsadda ishlatilishidan qo‘rqib, muzlatib qo‘ygandi. Afg‘onistondagi iqtisodiy vaziyatning yomonlashuvi fonida “Tolibon” bir necha bor Vashingtonni afg‘on aktivlarini blokdan chiqarishga chaqirgan. Oq uy Afg‘onistonning AQShdagi zaxiralarini blokdan chiqarish rejada yo‘qligini ma’lum qilgan.
Izoh (0)