Gretsiya hukumati koronavirus pandemiyasi tufayli joriy etilgan karantin cheklovlarini ikki haftaga kuchaytirishga qaror qildi. Bu haqda The Guardian nashri xabar berdi.
Nashr xabariga ko‘ra, mamlakatda COVID-19 bilan kasallanish holatlari ko‘payishining oldini olish maqsadida 3—16-yanvar kunlari, asosan, tungi ko‘ngilochar muassasalarga taalluqli bo‘lgan qo‘shimcha choralar ko‘riladi.
Xususan, bu davrda bar va restoranlar uzog‘i yarim tunda yopilishi kerak, bir stol atrofida yig‘iladiganlarning maksimal soni olti kishidan oshmasligi zarur. Mamlakat Sog‘liqni saqlash vazirligi qonunbuzarliklar aniqlangan taqdirda, bunday muassasalarda musiqani taqiqlash bilan tahdid qilmoqda.
Bundan tashqari, sport tadbirlariga kiritiluvchilarning soni 10 foizgacha cheklangan, lekin 1000 kishidan oshmasligi kerak. Qariyalarni parvarishlash muassasalariga tashrif buyurmoqchi bo‘lganlarda 48 soat ichida olingan PZR-testi manfiy natija ko‘rsatsagina, ularga keksalarni ziyorat qilishga ruxsat beriladi.
Shuningdek, hukumat aholini supermarketlar, jamoat transporti va umumiy ovqatlanish korxonalarida yuqori darajada himoyalangan niqoblarni taqishga majburlamoqda.
26-dekabr kuni Gretsiyada koronavirusga chalinishning yangi holatlari va uning fonida pandemiya boshlanganidan beri o‘lim holatlari antirekord o‘rnatgan – mos ravishda 9284 va 66 kishi.
19-dekabrdan boshlab Gretsiya hukumati sayyohlar uchun mamlakatga kirish qoidalarini kuchaytirgandi. Xususan, hukumat barcha sayyohlarga mamlakatga kelganidan keyin 48 soat ichida koronavirus uchun topshirilgan PZR-testining natijalarini taqdim etishni majburiy qildi.
Avvalroq Bangkokda koronavirus sabab ommaviy Yangi yil tadbirlarini o‘tkazish bekor qilingani, Belgiyada “omikron” shtammi tufayli yangi cheklovlar amalga kiritilgani, Niderlandiyada lokdaun e’lon qilingani haqida xabarlar berilgandi.
Izoh (0)