Кобулда Афғонистон Олий судининг ходимлари «Толибон» ҳаракати ҳокимият тепасига келганидан сўнг маош бериш тўхтатилгани туфайли норозилик намойиши ўтказди. TOLOnews телеканалининг аниқлик киритишича, гап техник ходимлар ҳақида кетмоқда, суд тизими «Толибон» вакилларидан иборат.
«Охирги тўрт ойда маош олмадим. Ҳозир қиш, ҳаво совуқ. Одамларнинг барчаси кўплаб муаммоларга дуч келмоқда», — дейди Олий суднинг Нажмиддин исмли ишчиси журналистларга.
«Биз Ислом Амирлигига петиция билан мурожаат қилдик. Улар ишдан бўшатилмаслигимизни билдирди, ‘Толибон’ ҳозирча уйда қолишимизни ва ишга бормаслигимизни айтди», — дейди суднинг яна бир ходими Муҳаммад Илҳом.
Унинг сўзларига кўра, Олий суднинг айрим бўлинмалари тугатилгани сабабли 900 га яқин техник ходим ишидан айрилган. Қолган техник ходимлар ноаниқ вазиятда — баъзиларига уйда қолиш таклиф қилинган, бошқалари ишлашда давом этмоқда, лекин маош олмаяпти.
«Толибон» октябрь ойи ўрталарида Олий суд учун янги тизим тузилганини эълон қилганди. Янги судьялар — «Толибон»га аъзо диндорлар. Афғонистоннинг «Толибон» томонидан ағдарилган ҳукумати даврида ишга олинган ходимлар Олий суд биноларини тозалаш ва бошқа маиший муаммоларни ҳал қилиш учун қолдирилган.
TOLOnews хабарига кўра, афғонистонлик шифокор ва ўқитувчилар ҳам ойлик маоши кечикаётганидан шикоят қилмоқда. «Толибон» ҳокимиятни эгаллаб олганидан кейин маош бериш тўхтатилган. Муаммонинг бир қисмини Афғонистоннинг қатор вилоятларида шифокор ва ўқитувчиларнинг меҳнати учун тўғридан-тўғри ҳақ тўлайдиган халқаро ташкилотлар ҳал қилмоқда. Масалан, октябрь-ноябрь ойларида Бирлашган Миллатлар Ташкилоти Афғонистон бўйлаб қарийб 23,5 минг тиббиёт ходимига қарийб 8 миллион доллар маош тўлаган.
Шу билан бирга, «Толибон» ҳокимиятни қўлга киритгач, мамлакатда ишсизлик кескин ошган. Хусусан, ҳаракат томонидан киритилган чекловлар туфайли кўплаб аёллар ишсиз қолди. Афғон аёллари ўз ҳуқуқлари, жумладан, ишлаш ҳуқуқи толиблар томонидан поймол этилишига қарши мунтазам равишда намойишлар ўтказмоқда, дейилади хабарда.
Афғонистондаги иқтисодий вазият «Толибон» ҳокимиятни қўлга киритганидан бери янада ёмонлашмоқда. Ҳаракат кўплаб мамлакатларда террорчи деб тан олингани боис бошқа давлатлар ҳукуматлари ва кўплаб халқаро ташкилотлар Афғонистон ҳудудида ўз лойиҳаларини амалга оширишни тўхтатиб қўйган. «Толибон» ҳокимиятни қўлга киритгунга қадар Афғонистон иқтисодиётининг деярли ярми чет эл маблағларидан иборат эди.
«Толибон» ҳокимиятга келгач, АҚШ ҳукумати афғон активларини, Жаҳон банки ва Халқаро валюта жамғармаси эса Афғонистон иқтисодиёти ва бошқарувини қўллаб-қувватлашга мўлжалланган маблағларни «Толибон» қўлига тушиб қолишидан ва нотўғри мақсадда ишлатилишидан қўрқиб, музлатиб қўйганди. Афғонистондаги иқтисодий вазиятнинг ёмонлашуви фонида «Толибон» бир неча бор Вашингтонни афғон активларини блокдан чиқаришга чақирган. Оқ уй Афғонистоннинг АҚШдаги захираларини блокдан чиқариш режада йўқлигини маълум қилган.
Изоҳ (0)