Bugun,

  • USD 10920.28
  • RUB 177.49
  • EUR 11052.42

“Tolibon” Tashqi ishlar vazirligi AQSh Kongressiga ochiq xat yo‘llab, unda Afg‘onistonning Amerikadagi mablag‘larini blokdan chiqarishni so‘radi. Bu haqda “Interfaks” xabar berdi.

Foto: USA.one

“Shundan xavotirdamizki, agar hozirgi vaziyat saqlanib qolsa, afg‘on hukumati va xalqi mintaqada hamda dunyoda ommaviy migratsiyaga sabab bo‘ladigan muammolarga duch kelishi mumkin, bu esa butun dunyo uchun qo‘shimcha gumanitar va iqtisodiy muammolarni keltirib chiqaradi”, — deyiladi maktubda, uning matni 17-noyabr kuni “Tolibon” nazoratidagi internet resurslarida e’lon qilingan.

“Tolibon”ning eslatishicha, Afg‘onistonda yangi hukumat e’lon qilinishi bilan Qo‘shma Shtatlar Afg‘oniston Markaziy banki aktivlariga nisbatan sanksiyalar joriy qilgan. Toliblarning fikricha, bu “Doha kelishuviga zid”. “2020-yil fevral oyida Doha kelishuvi imzolangandan beri biz ortiq bir-birimiz bilan to‘g‘ridan-to‘g‘ri ziddiyatda ham, harbiy muxolifatda ham emasmiz, aktivlarimizni muzlatish ortida qanday mantiq bo‘lishi mumkin?” — qayd etiladi hujjatda.

“Tolibon”ning ta’kidlashicha, hozir Afg‘oniston “uyushgan, mas’uliyatli va korrupsiyasiz hukumatga ega va uning aktivlarini muzlatish mantiqqa to‘g‘ri kelmaydi”.

Maktubda, shuningdek, “Afg‘oniston mintaqa va dunyo uchun xavf tug‘dirmasligi, hamkorlikning ijobiy yo‘li ochilgani” qayd etilgan. “Endi Afg‘onistonda o‘sish va rivojlanish uchun hamma narsa bor, AQSh Afg‘onistonning ishlab chiqarish, qishloq xo‘jaligi va tog‘-kon sanoatiga sarmoya kiritishi ham mumkin”, — deyiladi “Tolibon” maktubida.

Avgust oyida Afg‘onistonda “Tolibon” hokimiyat tepasiga kelganidan so‘ng,  AQSh Afg‘onistonning Amerika banklaridagi davlat zaxiralarini muzlatib qo‘ygan. Xalqaro valyuta jamg‘armasi (XVJ) ma’lumotlariga ko‘ra, 2021-yil aprel oyi holatida Afg‘oniston hukumati zaxiralari 9,4 milliard dollar bo‘lgan, bu mamlakat yillik yalpi ichki mahsulotining uchdan bir qismini tashkil qiladi. Bu mablag‘lar asosan AQShda saqlanadi, Amerika banklaridagi mablag‘larning aniq miqdori noma’lum, ammo Washington Post ma’lumotlariga ko‘ra, bu milliardlab dollarni tashkil qiladi.

Keyinroq XVJ ham Afg‘onistonga yordam berishni to‘xtatdi. Bunga “Tolibon” hokimiyatining tan olinish-olinmasligi muammosi sabab bo‘ldi. “XVJ har doimgidek xalqaro hamjamiyatning fikriga asoslanadi. Hozirda xalqaro hamjamiyatda Afg‘onistondagi hukumatni tan olish borasida aniqlik yo‘q, buning natijasida mamlakat maxsus qarz olish huquqlaridan yoki XVJning boshqa resurslaridan foydalana olmaydi”, — deyiladi jamg‘arma xabarida.

Izoh
Asosiy yangiliklar
Dunyo
AQSH armiyasi yollanma askarlar tanqisligiga duch kelmoqda — Bloomberg
Sport
“Temur ham, Bobur ham Hindistonni aql bilan olgandi”. Twitter foydalanuvchilari shaxmat Olimpiadasidagi g‘alaba haqida
Madaniyat
Instagram: Tug‘ilgan kunini nishonlagan Shahzoda Matchonova, yangi mashinali bo‘lgan Aziza Xalilova, farzandli bo‘lgan Yulduz Nizomova