Rossiyada Navalniy shtabining sobiq rahbarlari hibsga olindi

Rossiyaning Tomsk shahar politsiyasi siyosatchi Aleksey Navalniyning mahalliy shtabi sobiq rahbari, shahar kengashi deputati Kseniya Fadeyevani hibsga oldi. Bu haqda TV2 telekanali bir qancha manbalarga tayanib xabar berdi.

Xabarga ko‘ra, Moskvadan kelgan Tergov qo‘mitasi xodimlari Fadeyevaning uyida tintuv o‘tkazgan. Ayolning o‘zi Tomsk Tergov qo‘mitasi binosiga keltirilgan. Dastlabki ma’lumotlarga ko‘ra, Fadeyeva so‘roq uchun Moskvaga olib ketiladi.

Shuningdek, Irkutskdagi Navalniy mahalliy shtabining sobiq rahbari Zaxar Sarapulov ham tintuvdan so‘ng Tergov qo‘mitasiga olib ketilgan. Bu haqda Sarapulov asos solgan “Irkutskiy insayder” nashrida xabar berilgan.

Navalniyga tegishli ikki shtabning sobiq rahbarlari nima sababdan hibsga olingani hozircha noma’lum.

Navalniyning mintaqaviy shtabi sobiq rahbari Leonid Volkov Fadeyeva va Sarapulov bilan bog‘lana olmayotganini aytdi. “Hozirda huquqiy yordamni muvofiqlashtirishga va ular bilan bog‘lanishga harakat qilyapmiz”, — dedi u. Volkovning ta’kidlashicha, Fadeyeva va Sarapulovga Rossiyani tark etish taklif qilinganida, ular buni qat’iyan rad etgandi.

Volkovning qo‘shimcha qilishicha, u Navalniyning Barnauldagi shtabi sobiq koordinatori Vadim Ostaninning uyi tintuv qilingani va o‘zi hibsga olingani haqidagi ma’lumotlarni tekshirmoqda.

Sentabr oyida Rossiya Tergov qo‘mitasi Aleksey Navalniy va uning eng yaqin tarafdorlariga nisbatan “ekstremistik jamoat” tuzish bo‘yicha jinoiy ish qo‘zg‘atgan edi. Ish bo‘yicha hibsga olingan birinchi shaxs Navalniyning Ufa shahridagi shtabi sobiq rahbari Liliya Chanisheva bo‘lgandi.

Iyun oyida Moskva shahar sudi Aleksey Navalniyning hududiy shtablari, Korrupsiyaga qarshi kurash fondi (KKF) va Fuqarolar huquqlarini himoya qilish fondini ekstremistik tashkilotlar deb tan olgandi.