Turkiyada o‘tgan bir sutka ichida yana 26 099 kishida koronavirus tasdiqlandi. Bu mamlakatda 24-noyabrdan buyon qayd etilgan eng yuqori ko‘rsatkich hisoblanadi, deb xabar beradi Tengrinews.

Turkiya sog‘liqni saqlash vaziri Faxriddin Kojaning ma’lum qilishicha, o‘tgan bir sutka davomida koronavirusga 362 535 ta test olingan bo‘lib, ularning 26 099 tasi musbat chiqqan. Shuningdek, 157 kishi COVID-19 asoratlari oqibatida vafot etgan. Siyosatchi kasallanish holatlarining ortishini yangi “omikron” shtammi tarqalishi bilan bog‘lagan.

“‘Omikron’ boshqa variantlardan ko‘ra tezroq tarqalmoqda. Yurtimizda kasallanish holatlarining o‘sishi prognoz qilinmoqda”, — deydi Koja.

Avvalroq Germaniyada “omikron” shtammiga chalingan odamlar orasida birinchi o‘lim qayd etilgandi. Boris Jonson Britaniyada “omikron” shtammi bilan kasallangan bemor vafot etganini ma’lum qilgandi. Shuningdek, AQSh va Avstraliyada ham “omikron” bilan bog‘liq birinchi o‘lim kuzatilgan.

Jahon sog‘liqni saqlash tashkiloti “omikron” dunyoning yuzdan ortiq mamlakatida aniqlangani haqida xabar bergandi.