Braziliya shimoli-sharqidagi Baiya shtatida kuchli yog‘ingarchilik sabab yuzaga kelgan suv toshqinlarida 20 kishi halok bo‘ldi, yana 358 kishi jarohatlandi. Bu haqda 28-dekabr kuni hududiy fuqarolik mudofaasi boshqarmasiga tayanib, “Korrespondent.net” xabar berdi.
Qayd etilishicha, tabiiy ofat jami 470 ming kishiga zarar yetkazgan. Shtatdagi 116 ta shahardan 100 tasida favqulodda holat e’lon qilingan.
To‘xtovsiz yog‘ayotgan yomg‘ir ko‘priklar va o‘nlab uylarning qulashiga, suv toshqinlari va hali hisob-kitob qilinmagan moddiy zararlarga olib kelgan.
Braziliya Milliy meteorologiya instituti ma’lumotlariga ko‘ra, Baiya shtatining janubida noyabr oyida boshlangan kuchli yomg‘irlar yanvargacha davom etadi. Maranyan, Syeara va San-Paulu shtatlari talafot ko‘rgan hududlarga yordam berish uchun qutqaruvchilarni yuborishini ma’lum qilgan.
Avvalroq shtatda 35 mingdan ortiq odam o‘z uylarini tark etishga majbur bo‘lgani xabar qilingandi. Suv toshqinlari oqibatida kamida 1000 ta oila zarar ko‘rgan. Bir nechta aholi punktlarida evakuatsiya ishlari amalga oshirilyapti.
Eslatib o‘tamiz, dekabr o‘rtalarida Braziliyada yuz bergan suv toshqini tufayli 7 kishi halok bo‘lgan, minglab odamlar evakuatsiya qilingandi. O‘shanda Braziliya prezidenti va Baiya shtati gubernatori zarar ko‘rgan hududlarga tashrif buyurgan va ularni qayta tiklash uchun moliyaviy yordam ko‘rsatishga va’da bergan edi.
Mavzuga doir:
- 2021-yilda dunyo bo‘ylab 10 ta tabiiy ofatdan yetkazilgan zarar 170 milliard dollardan oshdi
- Janubiy Amerikada suv toshqinlari: o‘nlab qurbonlar bor
- Malayziyada yirik suv toshqinlari yuz berdi. 25 mingdan ortiq odam evakuatsiya qilindi (foto)
- Avstraliyada kuchli suv toshqinida daraxtga ilinib qolgan erkak 6 soat ichida xavfsiz joyga olib o‘tildi
Izoh (0)