27-dekabr, dushanba kuni butun dunyoda yana 1,44 milliondan ortiq kishida COVID-19 aniqlandi. Jons Hopkins universiteti ma’lumotlariga ko‘ra, bu kasallanish bo‘yicha yangi jahon rekordi. Bloomberg yozishicha, dushanba kuni so‘nggi yetti kunlik kasallanishlarning o‘rtacha darajasi ham rekord bo‘lgan — 841 ming atrofida. Bu bir oy oldin “omikron” shtammi birinchi marta Afrika janubida aniqlangan vaqtga nisbatan 49 foizga yuqori.
Shu bilan birga, so‘nggi oylarda o‘lim darajasi u qadar oshmagan. Yetti kun davomida kuzatilgan o‘limlarning o‘rtacha darajasi, “omikron” tarqalishiga qaramay, oktabr oyining o‘rtalaridan beri qayd etilayotgan 7 mingta holatida saqlanib qolgan.
Bloomberg so‘nggi tadqiqotlarga tayanib ma’lum qilishicha, “omikron” avvalgi shtammlarga qaraganda 70 marta tezroq yuqadi, lekin u keltirib chiqaradigan kasallik, ayniqsa, odam koronavirusga qarshi emlangan yoki buster doza olgan bo‘lsa, yengilroq o‘tadi. O‘lim ko‘rsatkichlarining o‘smaganiga sabab shunda, deb ta’kidlaydi gazeta.
Biroq kasallanish darajasining oshishi mamlakatlardagi sog‘liqni saqlash tizimlariga hamon jiddiy yuk bo‘lib qolmoqda, yangi cheklovlarning joriy etilishi esa kelgusi haftalarda o‘lim darajasida qanday o‘zgarishlar kuzatilishiga bog‘liq bo‘ladi, deyiladi xabarda.
O‘zbekiston Sog‘liqni saqlash vazirligining rasmiy ma’lumotlariga ko‘ra, 27-dekabr kuni mamlakatda 100 nafar kishida koronavirus aniqlangan. Bu 15-dekabrdan buyon eng past ko‘rsatkich deyiladi SSV xabarida. Unga ko‘ra, O‘zbekistonda COVID-19 ga chalinganlarning umumiy soni 198487 nafarni tashkil etmoqda, kasallikdan sog‘ayganlar 195520 nafarga yetgan, sog‘ayish ko‘rsatkichi esa 98 foizni tashkil etmoqda.
Shuningdek, o‘tgan sutkada 3 nafar koronavirusga chalingan bemorlar vafot etib, kasallik qurbonlari soni 1484 kishiga yetdi, deyiladi O‘zbekiston SSV xabarida.
Izoh (0)