Eron armiyasi besh kunlik harbiy mashg‘ulotlar yakunida bir nechta ballistik raketalarni uchirdi. Ushbu sinovlar Isroil uchun ogohlantirishdir, dedi Eron armiyasi bosh qo‘mondoni Muhammad Bageri. Uning so‘zlariga ko‘ra, mamlakatida “Eronga hujum qilishga jur’at eta oladigan davlatni yo‘q qilishga qodir” yuzlab raketalar mavjud.
Eron Islom inqilobi muhofizlari korpusi (IIMK) rahbari Husayn Salamiy ham Isroilga tahdidli murojaat bilan chiqib, Eronda bo‘lib o‘tgan manyovrlar “sionistik rejim vakillari uchun eng jiddiy ogohlantirish” ekanini ta’kidladi. “Agar ular zarracha xatoga yo‘l qo‘yishsa, qo‘lini kesib tashlaymiz”, — deya tahdid qildi Salamiy.
“Buyuk payg‘ambar 17” nomli harbiy mashg‘ulotlari 20-dekabr kuni Fors ko‘rfaziga olib chiqadigan uchta viloyat: Bushehr, Hormozgon va Xuziston hududida boshlangandi.
Buyuk Britaniya ballistik raketalarning uchirilishini keskin qoraladi
“Ballistik raketalar mintaqaviy va xalqaro xavfsizlikka tahdiddir. Ulardan foydalanish Birlashgan Millatlar Tashkiloti Xavfsizlik kengashining 2231-sonli rezolyutsiyasini qo‘pol ravishda buzadi. Rezolyutsiyada yadroviy kallaklarni yetkazib berishga qodir ballistik raketalar bilan bog‘liq har qanday harakatlar Eron uchun taqiqlangan”, — deyiladi Britaniya Tashqi ishlar vazirligi bayonotida.
Erondagi harbiy mashg‘ulotlar Eron xalqaro yadroviy kelishuvini saqlab qolish bo‘yicha Vena shahrida davom etayotgan muzokaralar fonida o‘tkazildi. Diplomatlarning so‘zlariga ko‘ra, muzokaralar nihoyatda og‘ir kechmoqda, AQSh ma’muriyati ularning muvaffaqiyatsizligiga hozirdanoq tayyorgarlik ko‘rmoqda.
Yadro bo‘yicha qo‘shma harakatlar rejasi deb nomlanadigan kelishuv 2015-yil yozida Tehron hamda beshta vositachi mamlakat o‘rtasida imzolangan. Keyinchalik Eronning mazkur kelishuvni qo‘pol ravishda buzganlikda ayblashgan. 2018-yil may oyi boshida AQSh kelishuvdan bir tomonlama chiqishini e’lon qilgan va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etgandi.
Izoh (0)