Эрон армияси беш кунлик ҳарбий машғулотлар якунида бир нечта баллистик ракеталарни учирди. Ушбу синовлар Исроил учун огоҳлантиришдир, деди Эрон армияси бош қўмондони Муҳаммад Багери. Унинг сўзларига кўра, мамлакатида «Эронга ҳужум қилишга журъат эта оладиган давлатни йўқ қилишга қодир» юзлаб ракеталар мавжуд.
Эрон Ислом инқилоби муҳофизлари корпуси (ИИМК) раҳбари Ҳусайн Саламий ҳам Исроилга таҳдидли мурожаат билан чиқиб, Эронда бўлиб ўтган манёврлар «сионистик режим вакиллари учун энг жиддий огоҳлантириш» эканини таъкидлади. «Агар улар заррача хатога йўл қўйишса, қўлини кесиб ташлаймиз», — дея таҳдид қилди Саламий.
«Буюк пайғамбар 17» номли ҳарбий машғулотлари 20 декабрь куни Форс кўрфазига олиб чиқадиган учта вилоят: Бушеҳр, Ҳормозгон ва Хузистон ҳудудида бошланганди.
Буюк Британия баллистик ракеталарнинг учирилишини кескин қоралади
«Баллистик ракеталар минтақавий ва халқаро хавфсизликка таҳдиддир. Улардан фойдаланиш Бирлашган Миллатлар Ташкилоти Хавфсизлик кенгашининг 2231-сонли резолюциясини қўпол равишда бузади. Резолюцияда ядровий каллакларни етказиб беришга қодир баллистик ракеталар билан боғлиқ ҳар қандай ҳаракатлар Эрон учун тақиқланган», — дейилади Британия Ташқи ишлар вазирлиги баёнотида.
Эрондаги ҳарбий машғулотлар Эрон халқаро ядровий келишувини сақлаб қолиш бўйича Вена шаҳрида давом этаётган музокаралар фонида ўтказилди. Дипломатларнинг сўзларига кўра, музокаралар ниҳоятда оғир кечмоқда, АҚШ маъмурияти уларнинг муваффақиятсизлигига ҳозирданоқ тайёргарлик кўрмоқда.
Ядро бўйича қўшма ҳаракатлар режаси деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашган. 2018 йил май ойи бошида АҚШ келишувдан бир томонлама чиқишини эълон қилган ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этганди.
Изоҳ (0)