Zimbabve sharqida yo‘lovchi tashishga mo‘ljallangan avtobusning benzovoz bilan to‘qnashuvi ko‘plab qurbonlarga olib keldi. Bu haqda mamlakat teleradioeshittirish korporatsiyasiga tayanib, “Korrespondent.net” xabar berdi.
Guvohlarning so‘zlariga ko‘ra, Xararedan Mutare tomon harakatlanayotgan Beta kompaniyasining avtobusi qarama-qarshi yo‘nalishga chiqib ketib, benzovoz bilan to‘qnashuv sodir etgan. Faqatgina yetti kishini qutqarib qolishga muvaffaq bo‘lingan.
Avtobus ichida o‘nlab yo‘lovchi bo‘lgani aytilmoqda. Ularning barchasi avtobusning yonib ketishi natijasida halok bo‘lgan. Ta’kidlanishicha, qurbonlarni shaxsini aniqlash uchun sud-tibbiyot ekspertizasi talab etilishi mumkin, chunki ayrim yo‘lovchilar tanib bo‘lmas darajada yonib ketgan.
Avvalroq Bangladeshdagi paromda sodir bo‘lgan yong‘in oqibatida kamida 30 kishi halok bo‘lgani, Myanmada sodir bo‘lgan ko‘chki oqibatida 100 ga yaqin odam bedarak yo‘qolgani, Yaponiyadagi ko‘p qavatli binoda sodir bo‘lgan yong‘in oqibatida 27 kishi halok bo‘lgani to‘g‘risida xabar berilgandi.
Izoh (0)