Afg‘onistonda “Tolibon” haydovchilarga mashinasida musiqa qo‘yishni, shuningdek, hijobsiz ayollarni avtomobilga mindirishni taqiqladi. Bu haqda Kabul News telekanali Twitter’da xabar berdi.
Xabarga ko‘ra, bunday ko‘rsatma yozma shaklda haydovchilar orasida tarqatilgan. Ko‘rsatma muallifi — Ezgulikni targ‘ib qilish va illatlarni yo‘qotish vazirligi.
Kabul News’ning yana bir tvitida aytilishicha,“Tolibon” Tashqi ishlar vazirligi vakili avtomobillarda musiqa qo‘yish va hijobsiz ayollarni olib yurish taqiqlanganini tasdiqlagan.
Shuningdek, Kabul News xabariga ko‘ra, haydovchilarga mahramsiz ayollarni uzoqroq masofalarga tashish ham taqiqlangan.
Avvalroq Afg‘onistonning G‘azni viloyatida “Tolibon” hukumatining mulozimlari shifokorlarga erkaklar hamrohligisiz qabuliga kelgan ayollarni davolashni taqiqlagandi. Ilgari ayollar kasalxonalarga qarindoshlari hamrohligida kelishi mumkin edi. Biroq “Tolibon” komissiyasi ayollarning erkaklar boshchiligisiz kasalxonaga borishini “noqonuniy va axloqsiz” deb topdi. Shifokorlarga bunday bemorlarga yordam bermaslik, kasalxonaga yotqizmaslik talabi qo‘yilgan.
Aamaj News agentligi “Tolibon” harakati a’zolari Kobul ko‘chalarida qolgan yuzi ochiq ayollarning suratlarini yo‘q qilishni boshlagani haqida xabar bergandi. Shuningdek, “Tolibon” ayollar ishtirok etgan bir qator teledasturlarni efirga uzatishni taqiqlagandi.
Izoh (0)