Vladimir Zelenskiy Rossiya prezidenti Vladimir Putin bilan uchrashishga tayyor. Bu haqda Ukraina prezidenti ma’muriyatining boshlig‘i Andrey Yermak ma’lum qildi, deb xabar beradi “Kommersant”. Uning so‘zlariga ko‘ra, muzokaralar Rossiya prezidenti bunga tayyor bo‘lishi bilan o‘tkaziladi.
“Prezident ko‘p marotaba bu kabi uchrashuvga tayyorligini gapirgan. U qachon va qayerda bo‘lish masalasi hozircha ochiq”, — deydi Yermak. U shu orqali Zelenskiy va Putinning uchrashuvi Pekindagi Olimpiada o‘yinlari ochilishida bo‘lib o‘tishi mumkinmi yoki yo‘q degan savolga javob qaytargan. Ukraina prezidenti ma’muriyatining rahbari Zelenskiy Putin bilan to‘g‘ridan to‘g‘ri muzokaralar urushni to‘xtatish uchun kerak deb hisoblashini eslatib o‘tgan.
Yermakning aytishicha, Zelenskiy 2021-yilda Rossiya prezidenti bilan bir marta “aloqa o‘rnatishga” uringan, biroq suhbat amalga oshmagan. U bu qanday sababga ko‘ra amalga oshmaganini eslay olmasligini ta’kidlagan.
“Prezidentimiz qo‘ng‘irog‘i kutilayotganiga va javob berishlariga ishonchi komil bo‘lmagan joyga hech qachon qo‘ng‘iroq qilmaydi”, — deya qo‘shimcha qiladi u. Aprel oyida Vladimir Zelenskiy Putin bilan muzokara o‘tkazishga uringanini ma’lum qilgandi: “Menda Rossiya urushni to‘xtatishni istaydimi, deb so‘rashadi. Bu savolga harakatlar bilan javob berish mumkin: men qo‘ng‘iroq qildim — javob berishmadi”, — degandi u.
Andrey Yermak, shuningdek, Ukraina Rossiya bilan “normand formati” va Donbass bo‘yicha uch tomonlama aloqa guruhi doirasida muntazam muzokaralar o‘tkazib kelayotganini ta’kidlagan.
Eslatib o‘tamiz, 20-aprel kuni Zelenskiy Putinga Ukrainaning Donbassidagi urush ketayotgan istalgan joyida uchrashishni taklif qilgandi. Putin bunga javoban agar Ukraina prezidenti Donbass muammosini muhokama qilmoqchi bo‘lsa, avval u Donetsk va Lugansk Xalq Respublikalarining rahbarlari bilan uchrashishi kerakligini va shundan keyingina uchinchi tomon sifatida Rossiya rahbariyati bilan uchrashishi mumkinligini aytgan. Shuningdek, u Rossiya tomonining Ukraina bilan ikki mamlakat o‘rtasidagi munosabatlar haqida gaplashishga tayyorligini bildirgan va Zelenskiyni “o‘ziga qulay bo‘lgan istalgan vaqtda” Moskvaga kelishga taklif qilgan.
Izoh (0)