Rossiyada portlash yuz bergan “Listvyajnaya” ko‘mir konidan so‘nggi qurbonning jasadi olib chiqildi

Rossiyaning Kemerovo viloyatida joylashgan, 25-noyabr kuni portlash yuz bergan “Listvyajnaya” ko‘mir konida qidiruv ishlari yakunlandi. Bu haqda mamlakat Favqulodda vaziyatlar vazirligiga tayanib, Meduza xabar berdi.

13-dekabr kuni qutqaruvchilar halok bo‘lgan konchilardan oxirgisining jasadini topib, yer yuzasiga olib chiqdi, deyiladi xabarda.

“Listvyajnaya”dagi portlashda jami 51 kishi halok bo‘lgan: 46 nafar konchi va 5 qutqaruvchi. 60 dan ortiq konchilar kasalxonaga yotqizilgan.

Tergov ma’lumotlariga ko‘ra, bir necha oy davomida shaxtaga yetarli darajada havo yetkazib berilmagan, bu esa portlash darajasidagi gaz konsentratsiyasiga olib kelgan. “Listvyajnaya” xodimlarining Meduza’ga ma’lum qilishicha, portlashdan sal avval shaxtada tog‘ jinslari qulab tushgan, natijada ventilyatsiya to‘silib qolgan va metan konsentratsiyasi o‘ta xavfli darajadan bir necha marta oshib ketgan.

Kondagi avariyadan keyin ikkita jinoiy ish qo‘zg‘atildi: xavfli ishlab chiqarish obyektlarida sanoat xavfsizligi talablarining buzishi bilan ikki yoki undan ortiq odamning o‘limiga sabab bo‘lgan ehtiyotsizlik; tasodifan ikki yoki undan ortiq shaxsning o‘limiga sabab bo‘lgan ehtiyotsizlik. Jinoiy ishda shaxta direktori, uning o‘rinbosari va uchastka boshlig‘i ishtirok etmoqda. Bundan tashqari, “Rostexnadzor”ning ikki xodimi beparvolikda ayblangan. Ularning barchasi hibsga olingan.

“Listvyajnaya”dagi portlash so‘nggi 11 yil ichida Rossiya konlarida sodir bo‘lgan eng yirik avariya bo‘ldi — bungacha 2010-yilda “Raspadskaya” konida 91 kishi halok bo‘lgandi. “Listvyajnaya” konida bundan avvalgi yirik avariya 2004-yil 28-oktabrda sodir bo‘lgan, o‘shanda metan portlashi natijasida 13 kishi halok bo‘lgan. Shundan so‘ng korxonaning 9 nafar xodimi shartli jazoga hukm qilingan.