Россияда портлаш юз берган «Листвяжнaя» кўмир конидан сўнгги қурбоннинг жасади олиб чиқилди

Россиянинг Кемерово вилоятида жойлашган, 25 ноябрь куни портлаш юз берган «Листвяжная» кўмир конида қидирув ишлари якунланди. Бу ҳақда мамлакат Фавқулодда вазиятлар вазирлигига таяниб, Meduza хабар берди.

13 декабрь куни қутқарувчилар ҳалок бўлган кончилардан охиргисининг жасадини топиб, ер юзасига олиб чиқди, дейилади хабарда.

«Листвяжная»даги портлашда жами 51 киши ҳалок бўлган: 46 нафар кончи ва 5 қутқарувчи. 60 дан ортиқ кончилар касалхонага ётқизилган.

Тергов маълумотларига кўра, бир неча ой давомида шахтага етарли даражада ҳаво етказиб берилмаган, бу эса портлаш даражасидаги газ концентрациясига олиб келган. «Листвяжная» ходимларининг Meduza’га маълум қилишича, портлашдан сал аввал шахтада тоғ жинслари қулаб тушган, натижада вентиляция тўсилиб қолган ва метан концентрацияси ўта хавфли даражадан бир неча марта ошиб кетган.

Кондаги авариядан кейин иккита жиноий иш қўзғатилди: хавфли ишлаб чиқариш объектларида саноат хавфсизлиги талабларининг бузиши билан икки ёки ундан ортиқ одамнинг ўлимига сабаб бўлган эҳтиётсизлик; тасодифан икки ёки ундан ортиқ шахснинг ўлимига сабаб бўлган эҳтиётсизлик. Жиноий ишда шахта директори, унинг ўринбосари ва участка бошлиғи иштирок этмоқда. Бундан ташқари, «Ростехнадзор»нинг икки ходими бепарволикда айбланган. Уларнинг барчаси ҳибсга олинган.

«Листвяжная»даги портлаш сўнгги 11 йил ичида Россия конларида содир бўлган энг йирик авария бўлди — бунгача 2010 йилда «Распадская» конида 91 киши ҳалок бўлганди. «Листвяжная» конида бундан аввалги йирик авария 2004 йил 28 октябрда содир бўлган, ўшанда метан портлаши натижасида 13 киши ҳалок бўлган. Шундан сўнг корхонанинг 9 нафар ходими шартли жазога ҳукм қилинган.