Braziliya shimoli-sharqida kuchli yomg‘ir suv toshqinlarini keltirib chiqardi. Oqibatda minglab odamlar vaqtinchalik boshpana izlashga majbur bo‘ldi, kamida yetti kishi hayotdan ko‘z yumdi.
“Dam olish kunlari Braziliyaning shimoli-sharqidagi Baxiya shtatida yomg‘irlar ortidan yuz bergan suv bosishi tufayli kamida yetti kishi halok bo‘ldi, minglab odamlar o‘z uylarini tashlab ketdi”, — deyiladi xabarda.
Braziliya fuqarolik mudofaasi ma’lumotlariga ko‘ra, suv toshqinlari oqibatida 175 kishi jabrlangan.
“Kuchli yomg‘irlar bir qancha shahar va qishloq hududlarini tashqi dunyodan butunlay uzib qo‘ydi, bu esa qutqaruvchilarning ishini ancha qiyinlashtirdi. Yakshanba (12-dekabr) kuni 200 dan ortiq harbiy o‘t o‘chiruvchilar ikkita vertolyot yordamida odamlarni qutqardi”, — deya qo‘shimcha qildi agentlik.
O‘z navbatida, Braziliya prezidenti va Baxiya shtati gubernatori zarar ko‘rgan hududlarga tashrif buyurdi va ularni qayta tiklash uchun moliyaviy yordam ko‘rsatishga va’da berdi.
Avvalroq Xitoy shimolidagi Shansi provinsiyasida bir hafta tinmagan kuchli yomg‘ir keng ko‘lamli suv toshqinlarini keltirib chiqargandi. Oqibatda mintaqadagi 1 million 760 ming kishini evakuatsiya qilishga to‘g‘ri kelgan.
Dekabr boshida Avstraliyaning Kvinslend shtatini suv bosib, oqibatda ikki kishi halok bo‘lgandi, mingga yaqin kishi uylarini tashlab ketgan.
Izoh (0)