Buyuk Britaniya bosh vaziri Boris Jonson koronavirusning yangi “omikron” shtammi sabab voyaga yetgan barchaga Yangi yilga qadar revaksinatsiyadan o‘tishga ruxsat berdi, deb xabar beradi “Kommersant”. Bundan oldin hukumat vaksinaning buster dozasini odamlar yanvar oxiriga olishi mumkinligini rejalashtirayotgandi. Jonson “omikron” bilan kasallanish to‘lqinini kutmoqda.
“Hech kimda shubha bo‘lmasligi kerak: ‘omikron’ to‘lqini yaqinlashmoqda”, — deydi Jonson telemurojaatida. Uning so‘zlariga ko‘ra, vaksinaning ikki dozasi yetarli emas, biroq uchinchisi koronavirusning yangi variantiga qarshi kurashda katta ahamiyatga ega bo‘lishi mumkin.
Avvalroq Jonson Angliyada “B rejani” joriy etgandi — u odamlar uydan turib ishlashini, jamoat joylarida niqob taqish majburiyatini va vaksina hujjatlaridan foydalanishni o‘z ichiga oladi. Shotlandiya, Uels va Shimoliy Irlandiya o‘z cheklovlarini joriy etgan. Buyuk Britaniyada hozirda 3 mingdan ortiq odamda “omikron” shtammi tasdiqlangan.
Eslatib o‘tamiz, Britaniyada “omikron” shtammi tufayli 7-dekabrdan mamlakatga kirish tartibi kuchaytirilgan edi. Unga ko‘ra, mamlakatga kiruvchi 12 yoshdan kattaning barchasi PZR yoki LFD-testining(immunoxromatografik tahlil usuli bilan o‘tkaziladi) salbiy natijasini taqdim etishi kerak.Koronavirusning yangi “omikron” shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi.
Izoh (0)