Afg‘onistonda “Tolibon” rahbariyati o‘zi tuzgan muvaqqat hukumat vazirlari, shuningdek, boshqa mansabdor shaxslarga Tashqi ishlar vazirligining roziligisiz xorijiy diplomatlar bilan uchrashishni taqiqlash haqida qaror qabul qildi. Bu haqda Afg‘oniston Islom Amirligining Twitter’dagi sahifasida e’lon qilingan, deb yozadi “TASS”.
“Afg‘oniston Islom Amirligi bosh vaziri (Muhammad Hasan Oxund)ning farmoniga ko‘ra, amirlik vazirlari hamda mansabdor shaxslarga boshqa davlatlar diplomatlari va elchilari bilan TIVning protokolga mas’ul departamenti ruxsatisiz uchrashish taqiqlanadi”, — deyiladi xabarda.
Eslatib o‘tamiz, 7-sentabr kuni “Tolibon” harakati Afg‘oniston hukumatining yangi tarkibini e’lon qilgandi. Uning qonuniyligi hali hech qaysi davlat tomonidan tan olinmagan.
Noyabr oyida “Tolibon” yetakchisi Haybatulla Ohunzoda mamlakatning 34 ta viloyatini 17 tasiga rahbarlar tayinladi. Shuningdek, ayrim viloyatlarning hokimlariga o‘rinbosarlar va politsiya boshliqlari ham tayinlangan.
9-dekabr kuni esa “Tolibon” Afg‘oniston milliy armiyasini shakllantirishga kirishgani xabar qilindi. “Tolibon” muntazam qurolli kuchlarni shakllantirish uchun 20 kishidan iborat maxsus komissiya tuzgan.
“Ushbu 20 kishidan iborat qo‘mita mamlakat xalqining xavfsizligi va osoyishtaligini ta’minlash maqsadida Mudofaa vazirligi tarkibida hukumat va islomiy tizim ehtiyojlaridan kelib chiqqan holda imkon qadar qisqa vaqt ichida fidoyi, intizomli, qurollangan, halol va mas’uliyatli armiyani shakllantirishga mas’uldir”, — deya xabar berdi toliblar Mudofaa vazirligining matbuot markazi.
Izoh (0)