Shimoliy va Janubiy Koreya, AQSh va Xitoy tinchlik shartnomasini tuzishga kelishib oldi. Bu haqda Janubiy Koreya prezidenti Mun Chje Inning bayonotiga tayanib, BBC xabar berdi.
Janubiy Koreya rahbarining aytishicha, Shimoliy Koreya talabi bo‘yicha AQShning “dushmanlik siyosati”ni to‘xtatish to‘g‘risidagi rasmiy muzokaralar hali boshlanmagan.
“Shu sababli biz deklaratsiyani muhokama qilish uchun bir stol atrofida o‘tirolmaymiz. Umid qilamizki, muloqot boshlanadi”, — dedi Chje In.
Sentabr oxirida KXDR Janubiy Koreya bilan urush tugaganini e’lon qilishga hali erta ekanini ma’lum qilgandi. Keyinroq Koreya Mehnat partiyasi markaziy qo‘mitasi bo‘lim mudiri o‘rinbosari, Shimoliy Koreya rahbarining singlisi Kim Ye Chjon Pxenyan Seul bilan Koreyalararo urushning rasman tugagani to‘g‘risida konstruktiv muloqotga tayyor ekanini aytdi.
Oktabr boshida Shimoliy Koreya Janubiy Koreya bilan aloqalarni to‘liq tiklashga qaror qildi.
Koreyalararo urush (1950—1953) tinchlik shartnomasi bilan emas, balki o‘t ochishni to‘xtatish haqidagi sulh imzolanishi bilan yakunlanganidan beri Koreya yarimoroli hali ham rasmiy ravishda urush holatida. Sulhni bir tomondan KXDR va Xitoy qo‘shinlari qo‘mondonlari, ikkinchi tomondan esa BMT bayrog‘i ostidagi AQSh imzolagan. KXDRning tinchlik shartnomasini imzolashga bo‘lgan keyingi barcha urinishlari AQSh tomonidan rad etildi.
AQSh prezidenti Donald Tramp davrida misli ko‘rilmagan AQSh—Shimoliy Koreya sammiti muzokaralari boshlandi, uning boshida urushni rasman tugatish bo‘yicha kelishuvga erishildi. Biroq, amalda hech qanday sezilarli natijalar kuzatilmadi.
Izoh (0)