Франция президенти Эммануэль Макрон Буюк Британия бош вазири Борис Жонсонни масхарабоз деб атади, у билан ишлашни эса циркка қиёслади. Бу ҳақда Франциянинг ҳар ҳафтада чиқадиган Canard Enchaine сатирик журналига таяниб, «РИА Новости» хабар берди.
Нашрнинг ёзишича, Макрон бу ҳақда 24—25 ноябрь кунлари Хорватияга ташрифи чоғида гапирган. Sky News телеканалига кўра, Франция президенти ўз ташрифини Па-де-Кале сувларида муҳожирларни олиб кетаётган қайиқ чўкиб, 27 киши ҳалокат қурбонига айланганидан бир неча соат ўтиб бошлаган. Британия бош вазири матбуот хизмати 24 ноябрь куни Жонсон ва Макрон муҳожирларнинг Ла-Манш бўйлаб ноқонуний сузиб ўтишига чек қўйиш учун ҳамма чорани кўришга келишиб олганини маълум қилди.
«Биз катталар суҳбатини олиб борамиз, бироқ у (Жонсон) билан гаплашиш бундан олдин ҳам кейин ҳам мен учун бемаънидек туюлади. Доим бир хил цирк. Бундай ажойиб мамлакатни масхарабоз раҳбарлиги остида кўриш жуда ачинарли», — дея Макроннинг сўзларидан иқтибос келтирилган Canard Enchaine мақоласида.
Canard Enchaine — сатира йўналишидаги француз ҳафталик журнали бўлиб, у ўзининг журналистик суриштирувлари билан машҳур. Хусусан, нашр 2017 йилги президентлик кампанияси вақтида собиқ бош вазир Француа Фиённинг рафиқаси саккиз йил давомида унинг сохта парламент ёрдамчиси сифатида маош олиб келганини ёзган. Бу суд муҳокамаларига сабаб бўлди, натижада Фиён давлат маблағларини ўзлаштирганликда айбдор деб топилди ва беш йилга (уч йили шартли) озодликдан маҳрум қилинди.
Эслатиб ўтамиз, 24 ноябрь куни Франция қирғоқлари яқинида ичида бир неча ўнлаб муҳожирлар бўлган пуфлама қайиқ чўкиб кетганди. Франциядан Буюк Британияга йўл олган муҳожирлар ушбу қайиқ ёрдамида Ла-Манш бўғозидан ўтишга уринган. Ҳалокатга учраганларнинг айримлари Франция соҳил хизматлари томонидан қутқарилган бўлса-да, улардан 27 нафари чўкиб кетган. BBC хабарига кўра, қурбонлар орасида уч нафар бола ҳам бор. Бу воқеа Париж ва Лондон ўртасида Франциядан Буюк Британияга сузиб ўтаётган муҳожирлар масаласини қандай ҳал қилиш борасида бир неча йиллардан бери давом этаётган баҳсни авж олдирган.
Изоҳ (0)