La-Mansh bo‘g‘ozining shimoli-sharqiy davomi hisoblanuvchi Fransiya yaqinidagi Pa-de-Kale bo‘g‘ozi suvlari ichida migrantlar bo‘lgan qayiqning ag‘darilib ketishi oqibatida 31 kishi halok bo‘ldi, deb xabar beradi “Korrespondent.net”.

Foto: AFP

Turli ma’lumotlarga ko‘ra, qayiqda Buyuk Britaniya tomon otlangan 33—50 nafargacha migrant bo‘lgan.

BFM telekanalining ma’lum qilishicha, halok bo‘lganlar orasida besh nafar ayol (ulardan biri homilador bo‘lgan), shuningdek, yosh qizcha bor. Ikki nafar migrant omon qolgan, hozirda shifokorlar ularning hayotini saqlab qolish uchun kurashmoqda.

Fransiya IIV rahbari Jerald Darmanenning so‘zlariga ko‘ra, fransuz politsiyasi hozirda fojiaga javobgar bo‘lishi mumkin bo‘lgan to‘rt nafar tashuvchini ushlagan.

Fransiya prezidenti Emmanuel Makron La-Manshdagi fojiadan keyin Yevropa Ittifoqi chegaralaridagi nazoratni kuchaytirishga chaqirgan.

O‘z navbatida Buyuk Britaniya bosh vaziri Boris Jonson Fransiya hukumatini migrantlarni Birlashgan Qirollikka noqonuniy yetkazish bilan shug‘ullanayotgan jinoiy guruhlarga qarshi kurashga ko‘proq e’tibor qaratishga chaqirgan.

Bosh vazirning so‘zlariga ko‘ra, mazkur fojia Fransiyadan Buyuk Britaniyaga eltuvchi dengiz marshruti naqadar xavfli ekanini, shuningdek, fransuz hukumati tomonidan La-Mansh orqali noqonuniy migratsiyaga qarshi kurashlar kerakli samarani bermayotganini ko‘rsatib bergan.

Britaniya hukumatining saytida e’lon qilingan xabarga ko‘ra, Jonson va Makron telefon orqali suhbatlashib, “bunday halokatli o‘limlarning oldini olish bo‘yicha birgalikdagi ishlarni zudlik bilan kuchaytirish va odamlar hayotini xavf ostiga qo‘ygan jinoiy guruhlarni to‘xtatish uchun barcha imkoniyatlarni ishga solish zarurligiga kelishib olgan”. Tomonlar bu borada Belgiya, Niderlandiya va “qit’adagi barcha sheriklar bilan” ishlashga maqsad qilgan.

Avvalroq Fransiyada qochoqlar La-Mansh orqali Britaniyaga suzib o‘tishga urinayotgani uchun sport do‘konlarida qayiq sotish to‘xtatilgani to‘g‘risida xabar berilgandi.