Eron “4+1” mamlakatlari guruhiga AQSh sanksiyalarini bekor qilish va Tehronning yadro bo‘yicha Qo‘shma harakatlar rejasi kelishuviga muvofiq yadroviy majburiyatlari to‘g‘risida ikkita yakuniy loyihani taqdim etdi. Bu haqda Eronning bosh muzokarachisi Ali Bakeri Kani Venada jurnalistlarga ma’lum qildi, deb yozadi “Iran.ru”.
Uning so‘zlariga ko‘ra, loyihalar mazmuni Eron muzokara guruhining barcha takliflari va pozitsiyalarini o‘z ichiga oladi. Shuningdek, u hozirda Eron tomonidan tayyorlangan hujjatlarni muhokamaga qo‘yishga tayyor yoki yo‘qligi haqida narigi tomonlardan javob kutayotganini qo‘shimcha qildi.
“Tabiiyki, narigi tomon hujjatlarni o‘rganishi va taqdim etgan loyihalar bo‘yicha Eron Islom Respublikasi bilan jiddiy muzokaralarga tayyorgarlik ko‘rishi kerak”, — dedi u va narigi tomonlar “imkon qadar tezroq bir xulosaga kelishi”ga umid bildirdi.
U jurnalistlarga shu paytgacha Venada o‘tkazilgan ikki tomonlama va ko‘p tomonlama uchrashuvlar hamda 2-dekabr kuni bo‘lib o‘tgan muzokaralar haqida ma’lumot berdi.
“Ushbu uchrashuvlarda biz muzokaralarning markaziy mavzulari, xususan, noqonuniy va og‘ir sanksiyalarni bekor qilish bo‘yicha o‘z fikrimizni bildirdik hamda o‘z pozitsiyamizni tushuntirish uchun zarur bo‘lgan mezon va ko‘rsatkichlar bilan o‘rtoqlashdik”, — dedi u.
Uning qo‘shimcha qilishicha, uchrashuvlarda noaniqliklarga barham berish va narigi tomonning Eron qarashlariga oid savollariga javob berishga harakat qilingan.
Eron vakili, shuningdek, muzokaralar olib boruvchi boshqa guruhlarni “tashqi o‘yinchilar”ning muzokaralarga aralashishiga yo‘l qo‘ymaslik haqida ogohlantirdi. Bakeri Kani bu ogohlantirishni ba’zilar to‘g‘ridan to‘g‘ri yoki bilvosita Qo‘shma harakatlar rejasini imzolagan tomonlar o‘rtasidagi kelishuvni buzish uchun muzokaralarga aralashishga harakat qilgani bilan izohladi.
Ma’lumot uchun, Eron elchilari va “4+1” mamlakatlari guruhi 29-noyabr kuni Avstriya poytaxtida Yadro bo‘yicha qo‘shma harakatlar rejasini qayta tiklashga qaratilgan muzokaralarning yettinchi raundini boshladi.
Yadro bo‘yicha qo‘shma harakatlar rejasi deb nomlanadigan kelishuv 2015-yil yozida Tehron hamda beshta vositachi mamlakat o‘rtasida imzolangan. Keyinchalik Eronning mazkur kelishuvni qo‘pol ravishda buzganlikda ayblashgan. 2018-yil may oyi boshida AQSh kelishuvdan bir tomonlama chiqishini e’lon qilgan va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etgandi.
Izoh (0)