Daniyaning Saxo Bank investitsiya banki 2022-yil uchun “hayratga soluvchi prognozlar”ni e’lon qildi. 10 ta bashoratdan iborat jamlanmani bankning o‘zidagilar “moliyaviy bozorlarga katta ta’sir o‘tkazishi mumkin bo‘lgan ehtimoldan uzoq hodisalar” deb ataydi. Har yilgi prognozlar 19-marta e’lon qilinmoqda. Meduza ularning eng e’tiborga moliklarini taqdim etdi.
Facebook bumerlar uchun platformaga aylanadi
Facebook “keksa bumerlar” uchun platformaga aylanib bormoqda — uning foydalanuvchilarni doim bir xil yoki yolg‘on kontentni ko‘rishga undovchi algoritmlari yoshlarni ijtimoiy tarmoqdan uzoqlashishiga majbur qilmoqda. Ijtimoiy tarmoq yoshlar va 40 yoshdan kattalar o‘rtasidagi madaniy qarama-qarshilik markazida qolyapti — yoshlar unga xuddi feyk yangiliklar va “xasis” korporatsiya sifatida qaramoqda.
Investorlar Facebook’ning yangi “ona” kompaniyasi Meta — yosh avlodni shiddat bilan yo‘qotayotganini tushunib turibdi, demak bu kelajakdagi potensialning yo‘qotilishi hisoblanadi. Yuqorida qolishga bo‘lgan urinish sabab Meta Snapchat yoki TikTok’ni xarid qilmoqchi va milliardlab dollarlarni o‘z servisiga yoshlarni qaytarish uchun sarflayapti. Shu bilan bir qatorda, u asosiy maqsadi foydalanuvchilar haqida ma’lumot to‘plash bo‘lgan “metaolam”ni yaratish bilan shug‘ullanmoqda.
Natijada Meta o‘z qiymatining 30 foizini yo‘qotyapti va uning xizmatlarini alohida tuzilmalarga bo‘lish tavsiya etiladi — Mark Sukerbergning monopoliya haqidagi orzulari shunday barbod bo‘ladi.
Umr ko‘rish davomiyligini 25 yilga oshirish borasidagi tibbiyot yutug‘i
2022-yilda tibbiyotda ulkan siljish sodir bo‘ladi — hujayra darajasidagi jarayonlarni boshqarish va ularning umrini uzaytirishi mumkin bo‘lgan dori vositalaridan kokteyl yaratilgan. Laboratoriya sichqonlari ustida o‘tkazilgan tajribalar ularning umri davomiyligi 30 foizga oshganini ko‘rsatgan. Insonlar uchun bu umrning 25 yilga uzayishini anglatadi.
Bundan tashqari, yangi dori vositasi qarishni sekinlashtiradi va qari hujayralarni yoshartiradi. DNKni tahrirlashning yangi usullari yosh bilan bog‘liq ko‘plab kasalliklardan qutulish imkonini beradi.
O‘rtacha umr ko‘rishning istiqboli haqiqiy yutuq bo‘lsa-da, axloqiy va moliyaviy muammolarni keltirib chiqaradi. Agar har bir kishi o‘rtacha 115 yil yashasa — bu pensiya tizimi uchun nimani anglatadi? Shuncha odamni boqish uchun oziq-ovqat yetadimi? Yangi doridan hamma ham foydalana olishi kerakmi?
Gipertovushli texnologiyalarning rivojlanishi yangi sovuq urush va kosmik poygaga olib keladi
Xitoy tomonidan gipertovushli raketaning sinovdan muvaffaqiyatli o‘tkazilishi AQSh uchun kutilmagan “sovg‘a” bo‘ldi, kosmosga chiqishga qodir gipertovushli apparatlar Vashington va Pekin o‘rtasidagi raqobatning nafaqat iqtisodiy, balki mudofaa sohasining markazida bo‘ladi. Poygaga ilg‘or harbiy texnologiyalarga ega boshqa “o‘yinchilar” ham qo‘shiladi: Rossiya, Hindiston, Isroil va Yevropa Ittifoqi.
Gipertovushli texnologiyaning rivojlanishi sovuq urush davridan beri mavjud ko‘p yillik “status-kvo”ning buzilishiga olib keladi. Ular o‘zaro ishonchli halokatning asosiy prinsipiga tahdid soladi — gipertovushli raketa yordamida birinchi yadroviy zarba berilgan taqdirda, qit’alararo ballistik raketalarning javob hujumini to‘liq bartaraf etish mumkin. Shu sababli poyga ommaviyga aylanadi: hech kim o‘zini ortda qolayotgandek his qilishni istamaydi.
Bu gipertovushli qurollarni yaratish bilan shug‘ullanuvchi kompaniyalarning jadal o‘sishiga, an’anaviy qurollanishga ega harbiy kemalar va samolyotlar uchun qurilmalar ishlab chiqaruvchi kompaniyalarning esa qulashiga olib keladi.
AQShda konstitutsiyaviy inqiroz boshlanadi
Demokratlar va respublikachilar o‘rtasidagi qarama-qarshilik o‘z chegarasiga yetib bormoqda. Kongress uchun o‘tkaziladigan oraliq saylovlarda respublikachilar g‘olib chiqish uchun barcha narsaga tayyor, demokratlar qo‘rquvni uyg‘otish bo‘yicha u qadar mashhur bo‘lmagan kampaniyasini olib boryapti.
Saylovlardan keyin bir yoki ikkala tomon ham ovozlar natijasining tasdiqlanishiga qarshi chiqish qiladi. Natijada Kongressning yangi tarkibini shakllantirish mumkin emas va u rejadagidek 2023-yilning 3-yanvaridan ish boshlay olmaydi.
Jo Bayden mamlakatni prezidentlik dekretlari yordamida boshqarishni davom etadi. AQShdagi demokratiya to‘xtatilgan — shu sababli Demokratlar partiyasi saylovlar natijasining Oliy sudda ko‘rib chiqilishiga qarshi chiqmoqda, chunki unda konservativ sudyalar hukmronlik qiladi. Mamlakatni keng ko‘lamli konstitutsion inqiroz qamrab olmoqda.
Amerikalik faollar o‘zgaruvchan bo‘lib bormoqda, dollar tushib ketayotgan bir vaqtda AQSh obligatsiyalarining daromadliligi ortyapti.
Yevropa Ittifoqi pensiya jamg‘armalaridan to‘ldirib boriladigan “Superfond”ni yaratadi
AQSh tomonidan Yevropaga sovuq urush davrida taqdim etilgan “xavfsizlik soyaboni” yo‘qolishi mumkin, chunki Vashingtonning asosiy harbiy va iqtisodiy raqobatchisiga dunyoning boshqa chekkasida joylashgan Xitoy aylanmoqda. Yevropa Ittifoqi mustaqil ravishda mudofaani mustahkamlash va bir vaqtning o‘zida energiya inqirozi boshlanishidan zarar ko‘rgan iqtisodlarga turtki berish yo‘llarini qidirmoqda.
Fransiya prezidenti Emmanuel Makron Italiya bosh vaziri Mario Dragi qo‘llab-quvvatlovi ostida qiymati 3 trillion yevro bo‘lgan Yevropa Ittifoqi “Superfondi”ni yaratishni taklif qilmoqda. U mudofaani ta’minlash bilan birga, iqlim o‘zgarishi muammolari va sof energiyaga o‘tishga yordam beradi. Yevropa aholisining qarib borayotgani, shuningdek, soliqlarning allaqachon yuqoriligi hisobga olinsa, siyosatchilar daromad solig‘ini oshirish orqali fondni moliyalash imkonsiz bo‘lishini tushunishadi.
Fransiya 40 yoshdan katta barcha ishchilarning pensiya aktivlarining bir qismini “Superfond”ning past daromadli obligatsiyalariga majburiy o‘tkazishni taklif etyapti, bu Yevroittifoqning o‘zining obligatsiyalari hisoblanadi. Tizim shu qadar muvaffaqiyatli bo‘lmoqdaki, Yevropada daromad solig‘i sekin-asta kamaymoqda.
Spotify NFT asosidagi musiqalarni tarqatuvchi servislar sabab kasodga uchraydi
Musiqachilar striming platformalari tinglangan musiqalardan kelayotgan daromadning 75 foizdan ortig‘ini o‘ziga olayotganidan norozi bo‘lmoqda, shu sababli ular musiqalarini NFT asosidagi servislar yordamida tarqatib, tinglovchilarga to‘g‘ridan to‘g‘ri raqamli huquqlarni sotmoqda.
Bu musiqachilarga real vaqt rejimida daromad olish va uni o‘rtakashlar bilan bo‘lishmaslik imkonini beradi, tinglovchilar esa o‘z pullari to‘g‘ridan to‘g‘ri ijrochiga borayotganini bilib turadi.
2022-yilda NFT asosidagi servislar orqali o‘z musiqasini Keti Perri, Jeyson Derulo va The Chainsmokers taqdim etadi, qolgan qo‘shiqchilar o‘z kompozitsiyalarini kasod bo‘layotgan an’anaviy oqimli platformalardan qaytarib olyapti: Spotify bir yil davomida o‘z qiymatining 33 foizidan ayriladi. Investorlar filmlar, kitob va boshqa kontentlarni sotishda ham NFT’da potensialni ko‘rmoqda.
Izoh (0)