Turkiya Yevropa kengashini turkiyalik tadbirkor va jamoat arbobi Usmon Kavalaning ishi bo‘yicha rejalashtirilgan qaror yuzasidan Anqaraga bosim o‘tkazmaslikka chaqirdi. Bu haqda Yevropa OAVlariga tayanib, “Interfaks” xabar berdi.
“Biz Yevropa Kengashini davom etayotgan sud jarayonini hurmat qilgan holda, sud hokimiyati mustaqilligiga xalaqit beradigan qarorlar qabul qilishdan tiyilishga chaqiramiz”, — deya Turkiya Tashqi ishlar vazirligi bayonotidan parcha keltirdi OAV.
Oktabr oyida Germaniya, Daniya, Kanada, Niderlandiya, Yangi Zelandiya, Norvegiya, AQSh, Finlyandiya, Fransiya va Shvetsiya elchilari qo‘shma bayonot chiqarib, Turkiya hukumatini uzoq vaqtdan beri hukmsiz qamoqda saqlanayotgan “Kavala masalasini tezroq va imkon qadar adolatli hal qilishga” chaqirgan edi. Ularning qayd etishicha, Kavalaning hibsda ushlab turilishi Turkiyaga “soya solmoqda”. Ushbu bayonot diplomatik nizoga sabab bo‘ldi.
Murojaat chop etilgach, elchilar Turkiya Tashqi ishlar vazirligiga chaqirilgan va u yerda mamlakat ichki ishlariga aralashishga urinishda ayblangan. Turkiya prezidenti Rajab Toyyib Erdo‘g‘on elchilarni Turkiyadan chiqarib yuborishi mumkinligi haqida ogohlantirgan.
Keyinroq Erdo‘g‘on elchilarni persona non grata deb e’lon qilishni buyurganidan so‘ng, elchilar yangi bayonot bilan chiqib, Vena konvensiyasining mamlakat ichki ishlariga aralashmaslik majburiyatini yuklagan moddasiga amal qilishlarini bildirdi. Shu tariqda ular Turkiyadan chiqarib yuborilmaydigan bo‘ldi.
Asli Parijda tug‘ilgan filantrop va jamiyat faoli, 64 yoshli Usmon Kavala 2017-yil noyabr oyida hibsga olingan. U Istanbuldagi Gezi bog‘i atrofidagi ommaviy namoyishlarda ishtirok etganlikda va 2016-yilda davlat to‘ntarishiga uringanlikda ayblangan. Kavalaga qo‘yilgan ayblovlar bir necha bor ko‘rib chiqilgan, biroq u hanuz hibsda qolmoqda.
Yevropa sudi 2019-yilda Turkiya huquq-tartibot idoralarida Kavalani hibsda ushlab turish uchun salmoqli dalillar yo‘qligi haqida qaror chiqargan. Turkiya hukumati sudning qarorini bajarmadi.
Izoh (0)