Peru prokuraturasi prezident Pedro Kastilioni lavozimni oshirish ishlariga aralashganlikda gumonlab, so‘roqqa tutmoqchiligini ma’lum qildi. Bu haqda Reuters xabar berdi.
Agentlik ma’lumotlariga ko‘ra, prokurorlar Kastilioni 14-dekabr kuni so‘roq qilishni rejalashtirmoqda. Bunga sabab shuki, ikki sobiq harbiy rahbar go‘yoki prezident tavsiya qilgan ba’zi amaldorlarni lavozimga ko‘tarishdan bosh tortgani uchun o‘z vazifalaridan ozod etilganini aytgan.
Shuningdek, mahalliy ommaviy axborot vositalarida e’lon qilingan xabarlarga ko‘ra, Kastilio go‘yoki o‘zining shaxsiy uyida uchrashuvlar o‘tkazgan va ularni jamoat kun tartibiga kiritmagan. Siyosatchining o‘zi har qanday qonunbuzarliklarni rad etib, uchrashuvlar shaxsiy bo‘lganini ta’kidlamoqda.
Eslatib o‘tamiz, o‘tgan hafta prokurorlar poytaxt Limadagi hukumat saroyida tintuv o‘tkazgandi, u yerda Kastilioning ofisi joylashgan. Tintuv davomida ofisning vannaxonasidan katta maslahatchiga tegishli bo‘lgan 20 ming dollar naqd pul topilgan. Kastilio maslahatchini ishdan bo‘shatdi va uning ma’muriyati poraxo‘rlik bilan kurashishga sodiqligini aytdi.
Hozirgi ayblovlar avvalroq bir guruh qonunchilarning Kastilioga qarshi impichment e’lon qilish haqida bildirgan taklifiga bosimni kuchaytirishi mumkin.
Sobiq qishloq o‘qituvchisi, “Ozod Peru” so‘l radikal partiyasi vakili Pedro Kastilio 6-iyun kuni bo‘lib o‘tgan prezidentlik saylovlarida g‘alaba qozongandi. Ayrim tahlilchilar Kastilioni “Peru tarixidagi eng so‘l prezident” deb ataydi. Qayd etilishicha, davlat rahbari prezidentlik maoshidan voz kechib, o‘qituvchilik maoshiga yashashni davom ettirishga va’da bergan. Biroq saylov kampaniyasi davomida u ko‘proq iqtisodiy barqarorlik va konservativ qadriyatlarga e’tibor qaratgandi.
Ma’lumot uchun, mis ishlab chiqarish bo‘yicha dunyoda ikkinchi o‘rinda turadigan Peruda 2016-yildan beri beshta prezident almashgan.
Izoh (0)