Toshkent va Samarqandda svetoforning qizil chirog‘idan o‘tib ketgan avtobus haydovchilarining biri ishdan olindi, boshqasi bilan profilaktik suhbat o‘tkazildi

Ijtimoiy tarmoqlarda Toshkent shahrida avtobus svetoforning qizil chirog‘idan o‘tib ketgani aks etgan video tarqaldi.

Ma’lum qilinishicha, 2021-yilning 22-noyabr kuni soat 10:00 da “7-avtobus saroyi” MChJ tasarrufidagi 98A-sonli yo‘nalishda harakatlanuvchi avtobus harakat davomida svetoforning taqiqlovchi qizil chirog‘idan o‘tib ketgani aks etgan video ijtimoiy tarmoqlarga joylashtirilgan.

Mazkur holat yuzasidan, “Toshshahartransxizmat” aksiyadorlik jamiyatining “Yo‘lovchi transportida harakat xavfsizligini nazorat etish boshqarmasi” xodimlari tomonidan hodisa sodir etilgan joyga chiqilib tezkor surishtiruv ishlari o‘tkazilganda, mazkur qoidabuzarlikni amalga oshirgan avtobus “7-Avtobus saroyi” MChJ tasarrufidagi, saroy raqami 468 bo‘lgan, 98A-sonli yo‘nalishda harakatlanuvchi haydovchi Y.Sh. tomonidan amalga oshirilgani aniqlandi hamda ushbu haydovchidan sodir etgan qoidabuzarligi bo‘yicha tushuntirish xati olindi.

Shu bilan birga, “7-avtobus saroyi” MChJ ma’muriyati yo‘nalish vaqtida yo‘lovchilar hayotini xavf ostiga qo‘ygani, harakat xavfsizligi qoidalariga rioya qilmagani hamda korxonaning mehnat tartib qoidalarini qo‘pol ravishda buzgani uchun ushbu haydovchi bilan tuzilgan mehnat shartnomasi o‘rnatilgan tartibda bekor qilindi.

Bundan tashqari, sodir etilgan qoidabuzarlik Toshkent shahar ichki ishlar bosh boshqarmasi yo‘l harakati xavfsizligi xodimlari tomonidan rasmiylashtirilib, haydovchiga nisbatan ma’muriy bayonnoma tuzildi.

Shuningdek, Samarqandda ham avtobus svetoforning qizil chirog‘ida o‘tib ketgani aks etgan video tarqaldi.

Samarqand IIB xabariga ko‘ra, avtobus haydovchisiga nisbatan bayonnoma tuzilib, profilaktik suhbat olib borildi.