Ижтимоий тармоқларда Тошкент шаҳрида автобус светофорнинг қизил чироғидан ўтиб кетгани акс этган видео тарқалди.
Маълум қилинишича, 2021 йилнинг 22 ноябрь куни соат 10:00 да «7-автобус саройи» МЧЖ тасарруфидаги 98А-сонли йўналишда ҳаракатланувчи автобус ҳаракат давомида светофорнинг тақиқловчи қизил чироғидан ўтиб кетгани акс этган видео ижтимоий тармоқларга жойлаштирилган.
Мазкур ҳолат юзасидан, «Тошшаҳартрансхизмат» акциядорлик жамиятининг «Йўловчи транспортида ҳаракат хавфсизлигини назорат этиш бошқармаси» ходимлари томонидан ҳодиса содир этилган жойга чиқилиб тезкор суриштирув ишлари ўтказилганда, мазкур қоидабузарликни амалга оширган автобус «7-Автобус саройи» МЧЖ тасарруфидаги, сарой рақами 468 бўлган, 98А-сонли йўналишда ҳаракатланувчи ҳайдовчи Й.Ш. томонидан амалга оширилгани аниқланди ҳамда ушбу ҳайдовчидан содир этган қоидабузарлиги бўйича тушунтириш хати олинди.
Шу билан бирга, «7-автобус саройи» МЧЖ маъмурияти йўналиш вақтида йўловчилар ҳаётини хавф остига қўйгани, ҳаракат хавфсизлиги қоидаларига риоя қилмагани ҳамда корхонанинг меҳнат тартиб қоидаларини қўпол равишда бузгани учун ушбу ҳайдовчи билан тузилган меҳнат шартномаси ўрнатилган тартибда бекор қилинди.
Бундан ташқари, содир этилган қоидабузарлик Тошкент шаҳар ички ишлар бош бошқармаси йўл ҳаракати хавфсизлиги ходимлари томонидан расмийлаштирилиб, ҳайдовчига нисбатан маъмурий баённома тузилди.
Шунингдек, Самарқандда ҳам автобус светофорнинг қизил чироғида ўтиб кетгани акс этган видео тарқалди.
Самарқанд ИИБ хабарига кўра, автобус ҳайдовчисига нисбатан баённома тузилиб, профилактик суҳбат олиб борилди.
Мавзуга доир:
Изоҳ (0)