O‘zbekistonda 2021-yilning 10 oyida majburiy mehnatga yo‘l qo‘ygan 62 nafar mansabdor shaxs jami 736,1 million so‘m miqdorida jarimaga tortilgan. Bu haqda 22-noyabr kuni bo‘lib o‘tgan brifingda Bandlik va mehnat munosabatlari vazirligi axborot xizmati rahbari Mavjuda Mirzayeva ma’lum qildi.
Uning so‘zlariga ko‘ra, joriy yilning 10 oyida majburiy mehnatga yo‘l qo‘ygan 62 nafar mansabdor shaxsga nisbatan Ma’muriy javobgarlik to‘g‘risidagi kodeksning 51-moddasi bilan 736,1 million so‘m miqdorida jarima qo‘llanilgan, 18 ta holatda yuqori turuvchi tashkilotlarga taqdimnomalar kiritilgan hamda 1 ta holatda hujjatlar sud organlariga, 4 ta holatda prokuratura organlariga kiritilgan.
Shuningdek, paxta yig‘im-terimi mavsumida jami 13 419 ta monitoring olib borilgan bo‘lib, mehnat qonunchiligini buzganligi uchun 65 nafar mansabdor shaxsga jami 198,4 million so‘m miqdorda ma’muriy jarima tayinlangan.
Bunda 5 ta holatda majburiy mehnat bo‘yicha, 21 ta holatda mehnat shartnomasi tuzilmaganligi, 25 ta holatda mehnat sharoitlari yaratilmaganligi, 14 ta holatda terim pullarining o‘z vaqtida to‘lamaslik faktlari aniqlanib, mansabdor shaxslar ma’muriy javobgarlikka tortilgan.
Shuningdek, aniqlangan qonun buzilishlarni bartaraf etish yuzasidan 48 ta holat yuzasidan yozma ko‘rsatmalar kiritilgan.
Mavzuga doir:
- Andijonda uyida obodonlashtirish xodimlarini ishlatgan hokim o‘rinbosari 13,5 mln so‘m jarimaga tortildi
- Qashqadaryoda o‘qituvchilarni obodonlashtirish ishlariga jalb etgan maktab direktori 21,6 mln so‘m jarimaga tortildi
- Sirdaryoda o‘qituvchilarni majburiy mehnatga jalb qilgan maktab direktori 12 mln so‘m jarimaga tortildi
Izoh (0)