Iroq bosh vaziri Mustafo al-Kazimiy unga suiqasd uyushtirganlarning ismlari mamlakat rasmiylariga ma’lum ekanini aytdi va ularning tez orada qo‘lga olinishini va’da qildi. Bu haqda bosh vazirning bayonotiga tayanib, “TASS” xabar berdi.
“Kechagi jinoyatni sodir etganlarni ta’qib qilmoqdamiz. Biz ularni juda yaxshi taniymiz va tez orada ismlarini oshkor qilamiz. Ular mamlakatimizni bosqinchi davlatga aylantirmoqchi, ammo biz bunga yo‘l qo‘ymaymiz ”, — deya ta’kidladi u Vazirlar Mahkamasining favqulodda yig‘ilishida.
Al-Kazimiyning ta’kidlashicha, Iroqda mamlakatda olib borilayotgan demokratik islohotlar va korrupsiyaga qarshi kurashdan norozi bo‘lgan muayyan kuchlar bor. “Biz mamlakatning mintaqaviy urushga kirishiga yo‘l qo‘ymadik va uning xavfsizligini ta’minlay oldik. Biz korrupsionerlarga qarshi murosasiz kurashni davom ettiramiz, ularning hech biri jazodan qutulib qolmaydi”, — dedi Vazirlar Mahkamasi rahbari.
7-noyabrga o‘tar kechasi Iroq poytaxti Bag‘dodda portlovchi modda o‘rnatilgan uchuvchisiz uchar apparat yordamida mamlakat bosh vaziri Mustafo al-Kazimiy qarorgohiga hujum uyushtirilgan edi. Harbiylar portlash bilan yakunlangan hujumni bosh vazirga suiqasd deb atagan, biroq uni o‘z vaqtida evakuatsiya qilishga muvaffaq bo‘lgan.
Xavfsizlik manbalarining Reuters agentligiga ma’lum qilishicha, hujumda bosh vazirning shaxsiy xavfsizlik xizmati xodimlaridan olti kishi jarohatlangan. Al-Kazimiyning o‘zi Twitter’da jarohat olmagani haqida yozdi. “Men yaxshiman va Iroq nomidan barchani xotirjamlik va vazminlikka chaqiraman”, — dedi u.
Al Arabiya telekanali ma’lumotlariga ko‘ra, dronlar Iroq poytaxtining shimoliy chekka hududidan, bosh vazir qarorgohidan o‘n kilometr uzoqlikdan yo‘llangan.
AQSh prezidenti Jo Bayden Iroqdagi teraktni qoraladi. U al-Kazimiyning qarorgohiga qilingan hujum bo‘yicha tekshiruvga yordam ko‘rsatish bo‘yicha topshiriq berdi.
Izoh (0)