AQSh prezidenti Jo Bayden Iroqdagi teraktni qoraladi. U mamlakat bosh vaziri Mustafo al-Kazimiyning qarorgohiga dronlar yordamida amalga oshirilgan hujum tekshiruviga yordam ko‘rsatish bo‘yicha topshiriq berdi, deb xabar beradi “Kommersant”.
Eslatib o‘tamiz, 7-noyabr kuni Iroq poytaxti Bag‘dodda portlovchi modda o‘rnatilgan uchuvchisiz uchar apparat mamlakat bosh vaziri Mustafo al-Kazimiy qarorgohiga hujum qilgandi. Bino Iroq poytaxtining hukumat binolari va xorijiy elchixonalarni o‘z ichiga olgan “yashil zonasi”da joylashgan. Harbiylar portlash bilan yakunlangan hujumni bosh vazirga suiqasd deb atagan, biroq uni o‘z vaqtida evakuatsiya qilishga muvaffaq bo‘lgan.
Reuters xabariga ko‘ra, Iroq bosh vaziri qarorgohiga hujum parlament saylovlari natijalaridan norozi namoyishchilar va huquq-tartibot xodimlari o‘rtasidagi to‘qnashuvlar fonida sodir bo‘lgan (saylov 10-oktabr kuni bo‘lib o‘tgan, Oliy saylov komissiyasi yakuniy natijalarni hali e’lon qilgani yo‘q). 5-noyabr kuni Bag‘dodning “yashil zonasi”da ro‘y bergan tartibsizliklar natijasida 120 dan ortiq kishi jarohatlangani xabar qilingandi. Namoyishchilar politsiyaga tosh otgan, politsiya esa o‘z navbatida havoga o‘q uzish bilan javob qaytargan.
Izoh (0)