Markaziy Amerikadagi Nikaragua davlatida 7-noyabr, yakshanba kuni umumiy saylovlar bo‘lib o‘tdi. 6,5 millionlik aholiga ega mamlakatda 4,5 milliondan ortiq saylovchilar prezident, vitse-prezident, Nikaragua Milliy assambleyasi (bir palatali parlament) va Markaziy Amerika parlamenti deputatlari uchun ovoz berdi.
Ovoz berish jarayoniga saylovda ishtirok etayotgan barcha siyosiy kuchlarning nazoratchilari hamda Rossiya, Abxaziya, Janubiy Osetiya, AQSh, Buyuk Britaniya, Germaniya, Ispaniya, Fransiya va Lotin Amerikasi davlatlaridan 200 dan ortiq mustaqil kuzatuvchilar hamrohlik qildi.
Rossiya Federatsiyasi, Abxaziya va Janubiy Osetiyadan kelgan kuzatuvchilar fuqarolarning saylov jarayonida faol ishtirok etganini qayd etdi. Ularning so‘zlariga ko‘ra, ovoz berishda jiddiy qonunbuzarlik holatlari aniqlanmagan. Saylovlar koronavirus pandemiyasi sharoitida tinch va epidemiologik talablarga rioya qilgan holda o‘tgan. Ovoz berish markazlariga kiraverishda qo‘llar dezinfeksiya qilinib, keksalar, homilador ayollarning kirishi osonlashtirilgan – ularga navbatsiz ovoz berishga ruxsat berilgan, nogironlarning saylov uchastkasi bo‘ylab harakatlanishiga yordam ko‘rsatilgan.
Ovoz berish jarayoni xavfsizligini 30 mingga yaqin maxsus tayyorgarlikdan o‘tgan politsiya xodimlari, shuningdek, harbiy xizmatchilar ta’minlagan. Saylov uchastkalarida va saylov uchastkalari yaqinida jiddiy hodisalar kuzatilmagan.
Saylov ishtirokchilari
Saylovlar hokimiyat partiyasi — “Sandinista milliy ozodlik fronti” boshchiligidagi boshqa oltita siyosiy partiya alyansi tomonidan o‘tkazildi. Xususan, ushbu partiyalar — Liberal konstitutsiyaviy partiya, Nikaragua xristian yo‘li partiyasi, “Liberal Nikaragua alyansi”, “Respublika uchun alyans”, Mustaqil liberal partiya, shuningdek, faqat Nikaragua Karib dengizi sohilidagi avtonom viloyatlardan Milliy Assambleya deputatligiga nomzodlar ko‘rsatadigan “YATAMA” hududiy partiyasi. Nikaragua qonunchiligidagi so‘nggi o‘zgarishlarga ko‘ra, bir partiyadan mamlakat prezidentligi va vitse-prezidenti lavozimiga nomzod sifatida turli jinsdagi shaxslar ko‘rsatilib, barcha nomzodlar ro‘yxatida ayollar va erkaklar teng darajada vakillik qilmoqda.
Eng ko‘p ovoz to‘plagan partiyadan nomzodlar 5 yil muddatga Nikaragua prezidenti va vitse-prezidenti etib saylanadi. Mahalliy sotsiologiya agentligining prognozlariga ko‘ra, mamlakatning amaldagi yuqori lavozimli amaldorlari — prezident Daniel Ortega va uning rafiqasi, vitse-prezident Rosario Murilio g‘alaba qozonish uchun eng katta imkoniyatlarga ega.
AQSh prezidenti Jo Bayden o‘zining yozma bayonotida Nikaraguada o‘tgan saylovlarni tanqid qildi. Unga ko‘ra, Nikaraguada o‘tkazilgan prezidentlik va parlament saylovlari demokratik standartlarga to‘g‘ri kelmaydi, ular “na erkin va na adolatli” o‘tgan.
Amerika yetakchisining fikricha, ovoz berish sahnalashtirilgan. “Bugun Nikaragua prezidenti Daniel Ortega va uning rafiqasi, vitse-prezident Rosario Murilio sahnalashtirgan jarayon pantomima edi”, — deyiladi Baydenning bayonotida.
“Biz Ortega va Murilio rejimini Nikaraguada demokratiyani tiklash bo‘yicha zudlik bilan choralar ko‘rishga, huquqbuzarliklarga qarshi chiqqani va nikaragualiklarning adolatli saylovlarda ovoz berish huquqini himoya qilgani uchun nohaq qamoqqa olingan mahbuslarni darhol va so‘zsiz ozod qilishga chaqiramiz. Bu talablar bajarilmas ekan, AQSh xalqaro hamjamiyatning boshqa a’zolari bilan yaqin hamkorlikda Nikaragua xalqini qo‘llab-quvvatlash, Ortega va Murillo hukumatlarini hamda hokimiyatning suiiste’mol qilinishiga hissa qo‘shganlarni javobgarlikka tortish uchun qo‘lidagi barcha diplomatik va iqtisodiy vositalardan foydalanadi”, — dedi Bayden.
Izoh (0)