«Уларни яхши таниймиз тез орада исмларини ошкор қиламиз», — Ироқ бош вазири унга суиқасд уюштирганлар ҳақида гапирди

Ироқ бош вазири Мустафо ал-Казимий унга суиқасд уюштирганларнинг исмлари мамлакат расмийларига маълум эканини айтди ва уларнинг тез орада қўлга олинишини ваъда қилди. Бу ҳақда бош вазирнинг баёнотига таяниб, «ТАСС» хабар берди.

«Кечаги жиноятни содир этганларни таъқиб қилмоқдамиз. Биз уларни жуда яхши таниймиз ва тез орада исмларини ошкор қиламиз. Улар мамлакатимизни босқинчи давлатга айлантирмоқчи, аммо биз бунга йўл қўймаймиз », — дея таъкидлади у Вазирлар Маҳкамасининг фавқулодда йиғилишида.

Ал-Казимийнинг таъкидлашича, Ироқда мамлакатда олиб борилаётган демократик ислоҳотлар ва коррупцияга қарши курашдан норози бўлган муайян кучлар бор. «Биз мамлакатнинг минтақавий урушга киришига йўл қўймадик ва унинг хавфсизлигини таъминлай олдик. Биз коррупционэрларга қарши муросасиз курашни давом эттирамиз, уларнинг ҳеч бири жазодан қутулиб қолмайди», — деди Вазирлар Маҳкамаси раҳбари.

7 ноябрга ўтар кечаси Ироқ пойтахти Бағдодда портловчи модда ўрнатилган учувчисиз учар аппарат ёрдамида мамлакат бош вазири Мустафо ал-Казимий қароргоҳига ҳужум уюштирилган эди. Ҳарбийлар портлаш билан якунланган ҳужумни бош вазирга суиқасд деб атаган, бироқ уни ўз вақтида эвакуация қилишга муваффақ бўлган.

Хавфсизлик манбаларининг Reuters агентлигига маълум қилишича, ҳужумда бош вазирнинг шахсий хавфсизлик хизмати ходимларидан олти киши жароҳатланган. Ал-Казимийнинг ўзи Twitter’да жароҳат олмагани ҳақида ёзди. «Мен яхшиман ва Ироқ номидан барчани хотиржамлик ва вазминликка чақираман», — деди у.

Al Arabiya телеканали маълумотларига кўра, дронлар Ироқ пойтахтининг шимолий чекка ҳудудидан, бош вазир қароргоҳидан ўн километр узоқликдан йўлланган.

АҚШ президенти Жо Байден Ироқдаги терактни қоралади. У ал-Казимийнинг қароргоҳига қилинган ҳужум бўйича текширувга ёрдам кўрсатиш бўйича топшириқ берди.