“Tolibon” yetakchisi Haybatulla Ohunzoda 15-avgustdan buyon birinchi marta mamlakatning 34 ta viloyatini 17 tasiga rahbarlar tayinladi, deb xabar beradi “Interfaks”.
“Tolibon” rasmiy vakilining o‘rinbosari Bilol Karimiyning ma’lum qilishicha, “Tolibon” muvaqqat hukumati rahbari Badahshon, Paktiya, Qunduz, Bag‘lon, Luvgar, Paktika, Bomiyon, O‘ruzg‘on, Farah, Saripul, Juzjon, Faryob, Maydon Vardak, Zobul, Nimro‘z, G‘azni viloyatlariga hokimlar tayinlagan.
Karimiy Twitter’dagi sahifasiga yozishicha, shuningdek, qaror bilan ayrim viloyatlarning hokimlariga o‘rinbosarlar va politsiya boshliqlari ham tayinlangan.
Eslatib o‘tamiz, 7-sentabr kuni “Tolibon” harakati Afg‘oniston hukumatining yangi tarkibini e’lon qildi. Mujohid Vazirlar Mahkamasining a’zolari ro‘yxatini ommaga taqdim qilgan, uning o‘zi hukumatda madaniyat va axborot vaziri lavozimini egalladi.
Qayd etilishicha, Muhammad Hasan Ohund “Tolibon” tuzgan yangi hukumatning rahbari bo‘ladi. Ohund “Tolibon” yetakchilarining rahbari hisoblanardi va avvalgi AQSh homiyligidagi hukumat qo‘shiniga qarshi urushda guruhni boshqargan. Qandahorlik yetakchi “Tolibon” asoschilaridan biri hisoblanadi.
Avvalroq AQSh Afg‘onistonga 144 mln dollarlik gumanitar yordam yuborishi, Rossiya Afg‘oniston Milliy qarshilik frontini afg‘onlararo nizo qo‘zg‘atmaslikka chaqirgani, Ashxobod Afg‘oniston hukumat delegatsiyasini Turkmanistonga tashrif buyurishga taklif qilgani to‘g‘risida xabar berilgandi.
Izoh (0)