Eron Fors ko‘rfazida harbiy mashg‘ulotlar boshladi

Eron 7-noyabr kuni Fors ko‘rfazida yillik harbiy mashg‘ulotlar o‘tkazishni boshladi. Bu haqda Reuters agentligi xabar berdi.

Zolfaqar-1400 o‘quv mashg‘ulotlari spikeri admiral Mahmud Musaviyning ta’kidlashicha, Ummon ko‘rfazidagi Eron sohillarida o‘tkazilayotgan harbiy mashg‘ulotlar mamlakatning harbiy qudrati va dushmanlarga qarshilik ko‘rsatishga tayyorligini namoyish qilishi kerak.

Mashg‘ulotlar maydoni Hormuz bo‘g‘ozining sharqiy qismidan Hind okeanining shimoliy qismi va Qizil dengizning bir qismigacha bo‘lgan hududni qamrab oladi.

Eslatib o‘tamiz, Fors ko‘rfazida Eron harbiylari va Amerika qo‘shinlari o‘rtasida vaqti-vaqti bilan yuz beradigan qarama-qarshiliklar 2018-yilda AQShning o‘sha paytdagi prezidenti Donald Tramp yadroviy kelishuvdan chiqib, Tehronga qarshi yanada qattiqroq sanksiyalar kiritganidan beri davom etib kelmoqda.

Aprel oyida Fors ko‘rfazida AQSh va Eron kemalari o‘rtasida mojaro chiqqan edi. AQSh harbiy dengiz kuchlarining ma’lum qilishicha, ko‘rfazda Eron Islom inqilob gvardiyasi korpusining (IIGK) uchta qayig‘i tezlik bilan AQShning ikkita harbiy kemasiga yaqinlashgani sababli kemalardan biri ogohlantiruvchi o‘t ochgan. Xabarga ko‘ra, AQSh kemalari radioaloqa va karnay orqali bir nechta ogohlantirishlar yuborgan, ammo IIGK ularga yaqin masofada harakat qilishda davom etgan. Shundan so‘ng Amerika ekipaji ogohlantiruvchi o‘q uzgan va IIGK qayiqlari xavfsiz masofaga chekingan.

O‘shanda AQSh IIGK dengiz kuchlarini dengizdagi keskinlikni oshirmaslikka chaqirgandi.

2020-yilning aprel oyida Donald Tramp AQSh harbiy dengiz kuchlariga Fors ko‘rfazida Eron katerlari Amerika kemalarini ta’qib qilsa, ularni yo‘q qilishni buyurgandi.