Germaniya kansleri vazifasini bajaruvchi Angela Merkel lavozimidan ketgach, nima bilan shug‘ullanishi bo‘yicha biror aniq rejasi yo‘qligini, ammo siyosat bilan boshqa shug‘ullanmasligini ma’lum qildi, deb xabar beradi “RBK”.
“Men siyosiy mojarolarni hal etmayman — bu bilan uzoq yillar shug‘ullandim: 16 yil federal kansler lavozimida, mamnuniyat bilan Yevropa Ittifoqida, xalqaro darajada doim multilateralizm bilan chiqdim. Hozir esa iste’fodan keyin nima bilan shug‘ullanishimni bilmayman. Oldin ham aytganman: avvaliga biroz dam olaman, keyin esa xayolimga nima kelishini ko‘ramiz”, — deydi u Deutsche Welle’ga bergan intervyusida.
Shu bilan birga, Merkel nafaqaga chiqqan “o‘qish va uxlash” niyatida ekani to‘g‘risidagi so‘zlarini yana tasdiqlagan.
“O‘ylaymanki, keyinroq boshimga boshqa rejalar keladi. Shunchaki uzoq yillar davomida bor diqqatimni menga berilgan kun tartibiga qaratdim va doim tayyor turishimga to‘g‘ri keldi. Hukumat rahbarining asosiy vazifalaridan biri nimadir sodir bo‘lsa, zudlik bilan chora ko‘rishdan iborat. Hozir esa nima qilishni xohlashimni ko‘rib chiqaman”, — deydi Merkel. Uning so‘zlariga ko‘ra, bunga taxminan ikki oy talab etiladi.
Eslatib o‘tamiz, 27-sentabr kuni bo‘lib o‘tgan Germaniyadagi parlament saylovlarida amaldagi moliya vaziri Olaf Shols rahbarligidagi Sotsial-demokratik partiya (GSDP) g‘alaba qozondi. Unga saylovchilarning 25,7 foizi ovoz berdi, ushbu natijaga muvofiq u yangi Bundestagda 206 ta o‘ringa ega bo‘ladi.
Saylov yakunlariga ko‘ra, Angela Merkel kansler lavozimini tark etadi. U hukumat rahbarligini o‘z ixtiyori bilan topshirishga va saylovlarda qatnashmaslikka qaror qilgandi.
Izoh (0)