Italiyada mafiya guruhlariga qarshi so‘nggi 30 yil ichidagi eng yirik sud jarayonida Kalabriyadagi “Ndragenta” jinoiy tashkilotining 70 nafar a’zosiga hukm o‘qildi. Sud jarayoni Lametsiya-Terme shahridagi shu maqsadda maxsus qurilgan majmuada bo‘lib o‘tdi, deb xabar beradi “Korrespondent.net”.
Ma’lum qilinishicha, sudlanuvchilar sud jarayonini yopiq eshiklar ortida tezlashtirilgan tarzda o‘tkazish bo‘yicha qaror qabul qilgan. Buning uchun Italiya hukumati ularga qamoq jazosi tayinlansa, uning uchdan bir qismini qisqartirib berishga rozi bo‘lgan.
6-noyabr kungi sud majlisida 91 nafar ayblanuvchi ishtirok etgan. Natijadan ularning 21 nafari aybsiz deb topilgan, qolganlari 20 yilgacha ozodlikdan mahrum etilgan. Shov-shuvlarga sabab bo‘lgan mazkur jarayon davomida 355 kishiga — “Ndrangeta” mafiya guruhining a’zolari, shuningdek, ularning sheriklari deya taxmin qilingan shaxslarga ayblov e’lon qilingan. Ular orasida siyosatchilar va politsiya xodimlari ham bor. Gap qotillik, bosqinchilik, giyohvand moddalar savdosi, pul yuvish va xizmat mavqeyini suiiste’mol qilish kabi jinoyatlar haqida ketmoqda.
“Ndrangeta” mafiya guruhi haqida
Ayblov e’lon qilingan shaxslarning aksar qismi Italiya, Germaniya, Shveysariya va Bolgariyada 2019-yilda o‘tkazilgan tezkor tadbirlar davomida qo‘lga olingan. Hukm o‘qilgan shaxslardan biri — Mankuzo mafiya klani rahbari — “Amaki” laqabli Luiji Mankuzo hisoblanadi. Hukm o‘qilishidan oldin ham u 20 yil qamoqda o‘tirgan.
Italiya prokuraturasi mamlakatda eng kuchli ta’sir doiralardan biriga ega zamonaviy mafiya guruhi “Ndrageta”ga qarshi sud jarayoni o‘rnak bo‘lishiga umid qilmoqda. Klan qurol-yaroq, odamlar va giyohvand moddalar savdosi bilan shug‘ullanadi, ko‘p milliardlik pul aylanmasiga ega. 2016-yilda uning a’zolari hatto Italiya shimolidagi ko‘chmas mulk operatsiyalarda ham ayblangan.
Eslatib o‘tamiz, yanvarda mafiyaga aloqadorlikda gumon qilingan 48 nafar kishi hibsga olingan. Tezkor operatsiyada 200 nafar huquq-tartibot organlarining xodimlari ishtirok etgan va tadbirga vertolyot ham jalb etilgandi. Fevral oyida esa Italiyada huquq-tartibot xodimlari tomonidan o‘tkazilgan ikkita maxsus operatsiya davomida mamlakatdagi eng qudratli “Ndrangeta” mafiyasining jami 45 nafar a’zosi hibsga olingandi.
Izoh (0)