Eron Milliy xavfsizlik Oliy kengashining (SNSC) kotibi Ali Shamhoniy Iroq bosh vaziri Mustafo al-Kazimiyga qarshi 7-noyabrga o‘tar kechasi uyushtirilgan suiqasdni xorijlik fitnachilarning harakatlari natijasi deb atadi. Bu haqda “Iran.ru” xabar berdi.
“Al-Kazimiyning hayotiga qasd qilishga urinishlar — bu ildizi xorijdagi tahlil markazlariga taqalishi kerak bo‘lgan yangi fitna bo‘lib, ular uzoq yillar davomida terrorchilik guruhlarini yaratish va qo‘llab-quvvatlash, bu mamlakatni bosib olish orqali mazlum Iroq xalqiga ishonchsizlik, bo‘linish va beqarorlikdan boshqa hech narsa keltirmagan”, — deb yozadi Shamhoniy Twitter sahifasida.
7-noyabrga o‘tar kechasi Iroq poytaxti Bag‘dodda portlovchi modda o‘rnatilgan uchuvchisiz uchar apparat yordamida mamlakat bosh vaziri Mustafo al-Kazimiy qarorgohiga hujum uyushtirilgan edi. Hodisada bosh vazirning shaxsiy xavfsizlik xizmati xodimlaridan olti kishi jarohatlangan. Al-Kazimiyning o‘zi Twitter’da jarohat olmagani haqida yozdi hamda barchani xotirjamlik va vazminlikka chaqirdi.
Keyinroq al-Kazimiy unga suiqasd uyushtirganlarning ismlari mamlakat rasmiylariga ma’lum ekanini aytdi va ularning tez orada qo‘lga olinishini va’da qildi. Uning ta’kidlashicha, Iroqda mamlakatda olib borilayotgan demokratik islohotlar va korrupsiyaga qarshi kurashdan norozi bo‘lgan muayyan kuchlar bor. Bosh vazir Iroq televideniyesi orqali so‘zlagan nutqida “Raketa va dronlar yordamida qo‘rqoqlarcha qilingan hujumlar na vatanni quradi, na kelajakni”, — dedi.
AQSh prezidenti Jo Bayden Iroqdagi teraktni qoraladi. U al-Kazimiyning qarorgohiga qilingan hujum bo‘yicha tekshiruvga yordam ko‘rsatish bo‘yicha topshiriq berdi.
Mavzuga doir:
Izoh (0)