Mexiko—Pueblo trassasida yuk mashinasi San-Markos—Uikstoko yo‘li bo‘ylab harakatlanish uchun haq to‘lashga navbatda turgan bir nechta mashinani urib yubordi. YTH oqibatida 19 kishi halok bo‘ldi. Bu haqda 6-noyabr kuni El Diario de Coahuila nashri xabar berdi.
Halok bo‘lganlar orasida bolalar ham borligi aytilmoqda. Shuningdek, olti kishining ahvoli og‘ir. Aniqlik kiritilishicha, hodisaga yuk mashinasining tormoz tizimidagi nosozlik sabab bo‘lgan bo‘lishi mumkin.
Qurbonlarning aksariyati o‘z mashinasida yonib ketgan. Yuk mashinasida 200 litrdan ortiq yoqilg‘i bo‘lgan.
Yuk mashinasi haydovchisi halok bo‘lgan. Voqea joyida qutqaruvchilar ishlamoqda, har ikki yo‘nalishda ham harakat to‘silgan. Jabrlanganlarning ahvoli haqida ma’lumot yo‘q.
Avvalroq Pokistonda yo‘lovchi avtobusi yuk mashinasi bilan to‘qnashib ketgan edi. Oqibatda kamida 27 kishi halok bo‘lgan, 30 dan ortiq kishi jarohat olgan.
Shuningdek, AQShdagi sirpanchiq trassada 130 ga yaqin mashina to‘qnashib, 6 kishi halok bo‘lgani, Ganada avtobuslar to‘qnashuvi oqibatida 17 nafar odam halok bo‘lgani hamda Kamerunda yuk mashinasi va avtobus ishtirokidagi YTHda 50 dan ortiq odam yonib ketgani haqida xabar berilgandi.
Izoh (0)