Ganada avtobuslar to‘qnashuvi oqibatida 17 nafar odam halok bo‘ldi

Ganada bir-biriga qarama-qarshi yo‘nalishda kelayotgan ikki avtobus to‘qnashib ketdi. Yo‘l-transport hodisasi oqibatida 17 kishi halok bo‘lgan, 44 nafar odam turli darajadagi jarohatlar olgan. Bu haqda Sinhua agentligi mahalliy politsiya bayonotiga tayanib xabar tarqatgan.

To‘qnashuv 3-fevral kuni tongda Kumasi va Tamale shaharlari o‘rtasidan o‘tgan Buype aholi yashash maskanidagi avtotrassada sodir bo‘lgan. Politsiya bergan axborotga ko‘ra, YTHdan keyin 16 nafar yo‘lovchi voqea joyida, bir nafari esa shifoxonada vafot etgan.

Jarohatlanganlar voqea joyiga yaqin yerda joylashgan shifoxonalarga yotqizilgan. Politsiya hodisa yuzasidan surishtiruv ishlarini boshlab yuborgan.

Ganada mikroavtobuslar hamda avtobuslar ishtirokidagi yo‘l-transport hodisalari tez-tez sodir bo‘lib turadi. Bunday ayanchli avariyalar ko‘pincha transport vositalarining texnik holati yomonligi yoki haydovchilarning yo‘l qoidalariga rioya etmasligi oqibatida yuzaga keladi.

Avval Afrikaning boshqa bir davlati – Kamerunda yuk mashinasi va avtobus ishtirokidagi YTH oqibatida 53 kishi halok bo‘lgani, 29 kishi jarohat olgani xabar qilingandi.