Xitoy Tayvan mustaqilligi tarafdorlari uchun mamlakatga, shuningdek Gonkong va Makaoga kirishni taqiqlamoqda. Bu haqda Xitoy Xalq Respublikasi Davlat kengashi huzuridagi Tayvan ishlari bo‘yicha muassasaning rasmiy vakili Chju Fenlyanga tayanib, “Kommersant” xabar berdi.
“Materikdagi rasmiylar qonunga muvofiq ‘Tayvan mustaqilligining’ qat’iy tarafdorlariga nisbatan intizomiy choralar ko‘rib, ular va ularning oila a’zolariga materik (XXR), Gonkong va Makaoning maxsus ma’muriy hududlariga kirishni taqiqlaydi”, — dedi Chju Fenlyan.
Bundan tashqari, bunday odamlar materikdagi tashkilotlar yoki shaxslar bilan hamkorlik qila olmaydi, shuningdek, XXRda daromad ko‘ra olmaydi. Pekin Tayvan mustaqilligi tarafdorlarini jinoiy javobgarlikka ham tortish niyatida.
Ma’lumot uchun Xitoyda fuqarolar urushi (1946—1949) natijasida Xitoy Kommunistik partiyasi mamlakatning materik qismida g‘alaba qozongan, Xitoy Respublikasining o‘sha paytdagi prezidenti Chan Kayshi boshchiligidagi oldingi rahbariyat Tayvanga qochib ketgan. Urush natijasida Xitoy ikkiga bo‘linib ketdi: birinchisi hozirgi kunga kelib jahonning yetakchi kuchlaridan biriga aylangan XXR, ikkinchisi esa 15 ta kichik davlat tomonidan tan olingan Tayvandagi Xitoy Respublikasi. Natijada bir-birini tan olmaydigan ikkita Xitoy hukumati yuzaga keldi.
Izoh (0)