G‘arbiy Afrika davlati Nigerda qurollangan terrorchilar 69 kishini, jumladan, shahar merini o‘ldirdi. Bu haqda 5-noyabr kuni The Guardian nashri xabar berdi.
Banibangou shahridan 30 kilometr uzoqlikda, mamlakat janubi-g‘arbidagi Mali bilan chegaradosh chekka hududda shahar meri boshchiligidagi delegatsiya pistirmaga uchragan. Mintaqani IShIDning mahalliy bo‘limiga aloqador jangarilar nazorat qiladi.
OAV ma’lumotlariga ko‘ra, hujum vaqtida 15 kishi qochishga muvaffaq bo‘lgan. Hozir jinoyatchilarni qidirish bo‘yicha operatsiya olib borilmoqda.
2021-yilda Nigerda 530 dan ortiq tinch aholi jangarilar qo‘lida halok bo‘ldi. Terrorchilar nishoniga ko‘pincha mahalliy amaldorlar, jumladan, shahar merlari, qishloq rahbarlari va diniy oqsoqollar tushadi. Terrorchilar shu tariqa mintaqani beqarorlashtirishga va markaziy hokimiyat nufuziga putur yetkazishga harakat qilmoqda. Ayni paytda mintaqada IShID jangarilaridan tashqari “Al-Qoida” bilan aloqador qurolli guruhlar ham bor.
Eslatib o‘tamiz, avvalroq Efiopiyada isyonchilar yuzdan ortiq odamni o‘ldirgan edi. Mamlakat hukumatining xabar qilishicha, “Tigra ozodligi uchun xalq fronti” isyonchilari Kombolcha shahrini egallab olgan va u yerda 100 dan ortiq yoshlarni qatl qilgan. Efiopiya hukumati Xalqaro hamjamiyatni bunday vahshiyliklarga ko‘z yummaslikka chaqirdi.
Avvalroq Nigeriyada qurolli shaxslarning masjidga qilgan hujumi oqibatida 18 kishi halok bo‘lgani, Efiopiyada noma’lum jangarilarning qishloqqa hujumi natijasida 200 dan ortiq odam vafot etgani haqida xabar berilgandi.
Izoh (0)