Oktabr oyida oziq-ovqat mahsulotlarining jahon miqyosidagi narxlari so‘nggi o‘n yildagi eng yuqori darajaga ko‘tarildi. Bu haqda Birlashgan Millatlar Tashkilotining Oziq-ovqat va qishloq xo‘jaligi tashkilotiga tayanib, Meduza xabar berdi.
Tashkilot hisob-kitoblariga ko‘ra, oktabr oyi yakunida eng ommabop oziq-ovqat mahsulotlarini o‘z ichiga olgan oziq-ovqat narxlari indeksining qiymati 133,2 punktga yetgan. Indeks oxirgi marta 2011-yilda 130 punktdan oshib ketgan edi.
O‘tgan oyda oziq-ovqat narxlari 3,9 foizga oshdi. Bunga ko‘p jihatdan don, yog‘ va sut mahsulotlari narxining ko‘tarilishi sabab bo‘lmoqda.
2020-yilning o‘rtalaridan boshlab oziq-ovqat narxlarining izchil o‘sishi davom etmoqda. So‘nggi 12 oyda oziq-ovqat narxlari indeksi 30 foizdan ko‘proqqa oshgan.
Avvalroq oziq-ovqat mahsulotlari va favqulodda yordamga muhtoj insonlar soni besh yil ichida eng yuqori darajaga ko‘tarilgani xabar qilingandi. Qayd etilishicha, 2020-yilda nizolar, iqtisodiy qiyinchiliklar, shuningdek, koronavirus pandemiyasi va ekstremal tabiat hodisalari sababli eng kamida 155 million kishi keskin ocharchilik muammosiga duchor bo‘ldi. Bu ko‘rsatkich 2019-yilga taqqoslaganda 20 millionga ko‘proq.
Fevral oyida BMT pandemiya sababli global oziq-ovqat tanqisligi xavfi haqida ogohlantirgandi. Tashkilotga ko‘ra, koronavirus pandemiyasi oqibatida oziq-ovqat mahsulotlarining narxlari 2020-yilga nisbatan ko‘tarilgani sababli qashshoq davlatlarning 2021-yilda oziq-ovqat inqiroziga duch kelishi xavfi yanada ortmoqda.
Izoh (0)