Si Szinpin Tayvan va Xitoyni tinch yo‘l bilan birlashtirish tarafdori ekanini bildirdi

Xitoy Xalq Respublikasi (XXR) raisi Si Szinpin mamlakatda monarxiyaning ag‘darilishiga sabab bo‘lgan Sinxay inqilobining 110 yilligi munosabati bilan nutq so‘zlar ekan, Xitoy va Tayvanni birlashtirish kerakligini aytdi.

BBC xabariga ko‘ra, Si Szinpin birlashish tinch yo‘l bilan amalga oshirilishi kerakligini ta’kidlagan. Shu bilan birga, u Xitoy xalqi ayirmachilikka qarshi kurashda katta tajriba to‘plaganini qayd etdi.

“Vatanimizni birlashtirishni yakunlash borasidagi tarixiy maqsad amalga oshishi lozim, u, albatta, amalga oshadi”, — dedi Xitoy rahbari. Si Szinpin Gonkong singari “bir mamlakat, ikki tizim” tamoyili bo‘yicha tinch yo‘l bilan birlashish istagida ekanini ta’kidladi. Bunga javoban Tayvan rasmiylari orol kelajagi unda yashovchi aholining xohish-istagiga bog‘liqligini bildirdi.

Tayvan garchi o‘zini mustaqil deb hisoblasa-da, rasmiy ravishda XXR tarkibiga kiradi. BBC xabariga ko‘ra, oxirgi bir hafta mobaynida Xitoy harbiy samolyotlari Tayvanning havo hujumiga qarshi mudofaa zonasidan kamida 150 marta uchib o‘tgan.

Avvalroq The Wall Street Journal AQSh maxsus operatsiya kuchlari va Dengiz piyodalari korpusi kontingenti Tayvanda mahalliy qo‘shinlarni maxfiy ravishda o‘qitayotgani haqida xabar bergandi.  Ta’kidlanishicha, AQSh maxsus operatsiya kuchlarining 20 ga yaqin xodimi Tayvan quruqlik qo‘shinlarining kichik guruhini shug‘ullantirmoqda. Dengiz piyodalari, o‘z navbatida, mahalliy dengiz floti bilan ishlayapti. Nashr manbasining aniqlik kiritishicha, AQSh harbiylari Tayvanda kamida bir yildan buyon bo‘lib turibdi.

Oq uy va Pentagon Tayvanda AQSh harbiylari borligi haqidagi ma’lumotga izoh berishdan bosh tortgan.