Gruziya sobiq prezidenti Mixail Saakashvilining sog‘lig‘i yomonlashdi, unda xotirasi bilan bog‘liq muammolar paydo bo‘lgan. Bu haqda uning advokati Nika Gvaramiyaga tayanib, “RBK” xabar berdi.
Gvaramiyaning ma’lum qilishicha, siyosatchining shundoq ham sog‘lig‘i bilan bog‘liq jiddiy muammolari bor. “U (Saakashvili — tahr.) odamlar ismini eslay olmayapti. Meni eslay olyapti, ammo suhbat davomida hatto ba’zi do‘stlarining ham ismini eslay olmasligi ma’lum bo‘ldi”, — deydi advokat.
Uning qo‘shimcha qilishicha, siyosatchi muqobil tibbiy komissiya shakllantirilmaguncha, shifokorlar ko‘rigidan o‘tishdan bosh tortmoqda. “U shaxsan menga ishonishini va barcha shifokorlarni hurmat qilishini bildirdi, biroq uning hisoblashicha, mazkur shifokorlar kengashi qaysidir darajada hukumat tomonidan nazorat qilinmoqda”, — deydi Gvaramiya.
Eslatib o‘tamiz, 1-oktabr kuni Mixail Saakashvili sakkiz yildan buyon birinchi marta Gruziyaga keldi. U chegarani noqonuniy kesib o‘tganlik ayblovi bilan qo‘lga olindi. Shundan keyin Gruziyada muxolifat norozilik namoyishlari boshlandi, ular Saakashvili ozod etilishini talab qildi. Hozir u Rustavi shahridagi qamoqxonada, u yerda o‘zini siyosiy mahbus deb hisoblagani uchun ochlik e’lon qilgan.
Gruziya Adliya vazirligi sobiq prezidentni qamoqxona kasalxonasiga yotqizishni bir necha bor taklif qilgan, biroq Saakashvili va uning advokatlari bunga mutlaqo qarshi. Ular Gruziyaning sobiq rahbarini xususiy fuqarolik klinikasiga olib borishni talab qilmoqda.
Izoh (0)